नेपाली हास्यव्यङ्ग्य अनलाइन पत्रिका

अमृत अधिकारी :

केही काम नगर्दानि कस्ले पिट्छ ताली
जति राम्रो गर्दा पनि किन आउँछ गाली
वसन्तमा हरियाली आन्दोलनमा र्‍याली
चुनाव आए मात्रै यहाँ पिट्ने गर्छन् झ्याली

ढिला आए कडा चाँडै गए लफडा
ठुलाबडा हरुलाई खै त नियम कडा
कमजोर पाए निहुँ खोजि सधैं गर्छ झगडा
बलियाहरुको खुट्टा तानि बन्न खोज्छ तगडा

मनमा पिर नभएनि खोज्छ तारेभिर
सिधा बाटो हिँडे पनि ठाडो हुन्न शिर
आज टरे भोलीको किन लिन्थ्यो पिर
घरमा खाने पिठो छैन खान खोज्छ खिर

अरु अघि लाएर आफू पछि पर्ने
बामे सर्ने बच्चा पनि एक्लै अघि सर्ने
झुटो कसम खानेहरु धनको पछि गिर्ने
हिजो खाको सब्ले बिर्से आज कस्ले तिर्ने

माथि माथि हेरेर लहराले बेर्छ
स्वार्थ मात्रै हेर्नेले खान पाए टेर्छ
जे आयो त्यै गर्छ सधैं बोली फेर्छ
जस्तो पर्छ तेस्तै टर्छ भोलि कस्ले हेर्छ

खान पाए भुँडी अनि खल्ती दुबै भर्ने
घर बनाउने ऋण लिई छानो मात्रै फेर्ने
तिर्नु परे पराई पनि तराईतिर सर्ने
लिन पाए सिङ्गो नेपाल आधाआधा गर्ने

काम चाहिँ कम गर्ने बढी गर्ने कुरा
सपना मात्रै देखेर हुन्न रहर पूरा
गफै मात्र लडाउनेको ठुलाठुला कुरा
छुरा रोपी मान्छे ढाल्ने कतिसम्म सुरा ।

०००
बैरेनी-९, धादिङ