नेपाली हास्यव्यङ्ग्य अनलाइन पत्रिका

खोक्रो पेट भित्रको आगोको ज्वाला जस्तो ?
अशान्ति र अभावले सून्य भएको गाउँ जस्तो ?
पसिनाका धारा पिउँदै भारी बोक्ने भरिया जस्तो ?
या देशघाती काम गरे पनि झण्डा ओढ्ने नेता जस्तो ?
भन्नुस् तपाईंलाई के मन पर्छ लेखूँ कविता कस्तो ?

सामुहिक बलात्कार भोग्ने के ती फुलमाया जस्तो ?
पुलमुनि सिस्नोमा फ्याँकिएको बालक जस्तो ?
वा भित्र भित्रैबाट चिच्याई चिच्याई कराइरहने चिहान जस्तो ?
भन्नुस् तपाईलाई के मन पर्छ, लेखूँ कविता कस्तो ?

आकाशबाटै सिनो खोज्दै हेर्ने ती गिद्ध जस्तो ?
शान्तिका परेवा उड्दा गाँजिहाल्ने बाज जस्तो ?
निमुखा देख्दा सिंह जस्तै गर्जने ती शोषकजस्तो ?
पदमा पुग्दा निर्लज्ज हुँदै सिङ्गै देश रित्ताए जस्तो ?
आफ्नो स्वार्थ पूर्ति गर्न देशकै साँचो सुम्पे जस्तो ?
भन्नुस् तपाईलाई के मन पर्छ, लेखूँ कविता कस्तो ?

आफ्नो देशले रोजगार नदिई विदेशतिर धपाए जस्तो ?
रगत पसिना बेची बेची मरूभूमिमा रमाउन परे जस्तो ?
जेटमा उडी गए पनि बन्द बाकसमा फर्के जस्तो ?
छटपटी र चित्कार बीच पनि फूलमा रमाउने कवि जस्तो ?
बा सहर जलिरहँदा पन राग अलाप्ने निरो जस्तो ?
भन्नुस् तपाईंलाई के मन पर्छ, लेखूँ कविता कस्तो ?

आफ्नै घर भत्काउने असङ्ख्य ती बाँदर जस्तो ?
अर्काका भागमा आँखा गाड्ने भुस्याहा ती कुकुर जस्तो ?
कराईको दुध आफै रित्याई सुधो बन्ने ती विरालो जस्तो ?
लात खाएपछि बात मान्ने धोवीको ती पाजी जस्तो ?
या चुनाव आउँदा लाचार बन्दै भोट माग्ने नेता जस्तो ?
भन्नुस् तपाईलाई के मन पर्छ, लेखूँ कविता कस्तो ?

आएका शरणार्थी अन्तै गए आफैं शरणार्थी भए जस्तो ?
अग्ला–अग्ला बाँसलाई फिस्टोले नुहाएँ भने जस्तो ?
आफ्नो हुती केही नभए पनि आकाश थाम्ने हुटिट्याउँ जस्तो ?
उत्तरदायित्व केही नभएको टाउको लुकाउने सुतुरमुर्ग जस्तो ?
भन्नुस् तपाईलाई के मन पर्छ लेखूँ कविता कस्तो ?

टुक्रा हराएको देश फेरि टुक्राउँदिन भने जस्तो ?
अपराध गरी जेल गए पनि क्विन्टलको माला लाए जस्तो ?
आफै भ्रष्ट भएर पनि मुख्तियारी पाए जस्तो ?
विदेशबाट आउनेलाई एयरपोर्ट देखिनै ठगे जस्तो ?
भन्नुस् तपार्इंलाई के मन पर्छ, लेखूँ कविता कस्तो ?

बुथ क्याप्चर गरी गरी मन्त्री पद पाए जस्तो ?
बन्दुक बारूद देखाई देखाई चन्दा असुल गरे जस्तो ?
बन जङ्गल नदी बेची सत्ता चलाए जस्तो ?
वा छेपारो जस्तो रङ्ग फेरि फेरि पद पचाए जस्तो ?
भन्नुस् तपाईंलाई के मन पर्छ, लेखूँ कविता कस्तो ?
बालुवाटार, काठमाडौं