नेपाली हास्यव्यङ्ग्य अनलाइन पत्रिका

’देशको राजनीति बहुतै असल छ । ’विदेशी प्रभु’ को भक्ति छैन, विदेशी चलखेल पनि छैन । आपसी बाझो पनि छैन ।
नेताहरू पनि संसारकै सर्वोत्कृष्ट असल छन् । कसैउपर पनि अनियमितता, अकर्मण्यता वा अक्षमताको बात लाउन सकिन्न । सबै मिलेर पालैपालो चलाउन र बाँडी खान पोख्त छन् । आसेपासेलाई पनि च्यापेकै छन् । पिआर डिभी खल्तीमा बोकेर याँ कुर्सीमा हालिमुहाली गरेका पनि छैनन् । विदेशतिर खाता पनि कसैका छैनन् । जनताप्रति यति इमानदार र उत्तरदायी छन् कि, पाल, चामल, कम्बल, जस्तापाता आदि केही पनि हराउन दिएनन् । विजली र पानीका आयोजनाहरूको म्याद पनि त्यत्तिक्कै थपिरहेका छैनन् ! भैंचालो पीडित सबैलाई उद्धार र राहत पुर्याएकै हुन्, नपाई कसैले दुख पाएका छैनन् । अर्काले देशको सीमा मिच्ला भनी हरबखत खबरदारी गरिरहेकै हुँदा, सीमा पनि कतै मिचिएको छैन ।

प्रशासन पनि चुस्त दुरूस्त छ । धारामा पानी र तारमा विजली चौबिसै घण्टा आइरहन्छ, कहीं कतै कुनै चुहावट नै छैन । अखाद्य अपेय बनाउनेहरूले पनि लाखौंको नाफा गरिसकेपछि केही हजारको दण्ड पाएकैछन् । ’अलिअलि’ भाउ बढ्नेबाहेक, कालाबजारी पनि भएको छैन । अपराधीजति सबै जेलमा कोचिएका छन्, भलाद्मी जति सबै गाउँघरमै सुरक्षित छन् ।

अर्थव्यवस्था पनि, विश्वको नमूनाकै रूपमा राम्रो छ । युवाहरू, देशमा काम नपाएर नभै, घुमघाम गर्न मात्र विदेशिएका हुन् । तिनले रेमिटेन्स नपठाए पनि फरक पर्दैन, आफ्नो घरखेत बेचेर पनि देश चलाइदिन नेताहरू तयारै छन् । ती युवाहरूले पनि, विदेश नगएर, पार्टी नेताको चम्चा लठैत बनी उनीहरूलाई सघाउने महान् कामको अवसरको सदुपयोग गर्ने खुला मौका देशमै टन्न पाएकै छन् । औद्योगिक क्षेत्रलाई ट्रेड युनियनहरूले ’सघाउने’ काम दह्रैसित गरिरहेकै छन् । करोडौँ कर लुकाउनेलाई एक दुई लाख मात्रै भए पनि तिराएरै छोडिएको छ । ’प्रभु’हरूले पनि सबै ’दिन्छम्, गर्दिन्छम्’ भन्नुभाकै छ ।

समष्टिमा देशमा सुख, शान्ति, विकास, सामाजिक सद्भाव आदि भएसम्मका सबै कुरा आफ्नो उत्कृष्टतम रूपमा विद्यमान छन् । जनता चैं, कुरै नबुझी, केही ’प्रतिगामी’हरूको लहैलहैमा लागेर मात्र कराएका हुन् । जनताले त्यसरी कराउन हुन्न, राम्ररी हेर्नु र बुझ्नुपर्छ । सबैतिर, ’राम्रैराम्रो’ देखिइरहेको छ । भविष्य उज्ज्वलै उज्ज्वल छ ।’
झुट बोलिस् भनेर मलाई दोष लगाउन नपाई, है ! ञी !
–माधवराज आचार्यको फेसबुक स्टाटस