नेपाली हास्यव्यङ्ग्य अनलाइन पत्रिका

सीमा फुटाऊँ अनि देश बाडूँ
तत्काल वार्तासँग शेष बाडूँ
टुक्र्याउँदै शीर्ष बनूँ म नेता
भविष्य सोच्ने क्षण छैन वेत्ता ।।

झुकूँ तुरन्तै सुख खोज्नलाई
बिर्सेर सारा जन राष्ट्र भाइ
नेतृत्व के हो यसरी चिनाऊँ
यो राष्ट्र टुक्रा अब पार्न पाऊँ ।।

साम्राज्य बुझ्ने क्षण हैन आज
न दासता मर्म बुझूँ समाज
जसो जसो भारत भन्छ त्यस्तै
गरूँ म थालूँ सहजै दुरुस्तै ।।

पानी दिऊँ बाँध बनून् यथेष्ट
दाता बनूँ सुन्दर देश श्रेष्ठ
यो बुद्धिमत्ता किन व्यर्थ पारूँ
वार्ता गरी दान दिएर टारूँ ।।

जसो गरूँ सान रहोस् म नेता
सोधिन्न को हुन् जनता र वेत्ता
बाडूँ खुलेरै जति भाग माग्छन्
भविष्य सन्तान विदेश भाग्छन् ।।

कथा पढून् सन्तति देश एक
थियो कुनै दानबिसे विवेक
नेता थिए शीर्ष भविष्य द्रष्टा
नेपाल के विश्व अनन्त स्रष्टा ।।

सीमा नदी दान म यज्ञ थालूँ
वार्ता छ आजै अब मन्त्र फालूँ
आचार्य बन्ने क्षणमा सहर्ष
दिऊँ सबै भारत वर्ष हर्ष ।।

काठमाडौं