नेपाली हास्यव्यङ्ग्य अनलाइन पत्रिका

१.
को छन् तेरा ख्वामितहरू, कस्को पाउ छुन्छस् हरे ?
दुख पर्दा भेटिँदैनस्, कुन दुनियाँमा हुन्छस् हरे ?
जुन दिन तेरै कर्तुतहरूले भड्खालामा तँलाई जाक्छ,
अनि आफ्नै कर्म सम्झी, धुरुधुरु रुन्छस् हरे ।।

२.
फड्किएर भाग्नखोज्ने, भड्खालामा परे भन्थ्यो,
ती धार्नीका टाउकेहरू, बिसौलीमा झरे भन्थ्यो ।
सहर बस्ने एउटा साथीले म्यासेन्जरमा खबर दियो,
निभ्न लागेका बत्तीहरूले, निकै धिपधिप गरे भन्थ्यो ।।

३.
कुकुरको राजमा अचेल, निकै ठूलो घमासान छ ।
आफूले मौका नपाउने, लुरे कुकुर परेसान छ ।
जस्को शक्ति उस्को भक्ति जस्ले सक्छ उस्ले तान्छ,
एउटा हड्डी धेरै कुकुर, परस्परमा तानातान छ ।।

४.
हावादारी अरु हुन्नन्, दरवारी र झोले जस्तो ।
मुखले ठिक्क व्यवहारमा, अगुल्टाले पोले जस्तो ।
समानताको कुरो पनि सुनाउनलाई मात्रै रेछ,
जति खायो नअघाउने, आश्वासनको खोले जस्तो ।।

५.
खाने मुख हाल्ने भुँडी, हातमा थाप्ने भाँडो भयो ।
बल्ल थाहा भो तिम्रो विकास, किन यति चाँडो भयो ।
भीक्षाटनको चारो टिपी देश चलाउँछु भनी हिंड्छौ,
यो मगन्ते पारा तिम्रो, हाम्रो लागि घाँडो भयो ।।

०००
चन्द्रनिगाहपुर