नेपाली हास्यव्यङ्ग्य अनलाइन पत्रिका

हेटौडा, ०८० वैशाख २० । सिस्नुपानी नेपाल मकवानपुरले उत्कृष्ट हास्यव्यङ्ग्य कविताको सूची सार्वजनिक गरेको छ ।
खुला हास्यव्यङ्ग्य कविता प्रतियोगितामा प्राप्त कूल ८१ कविताहरूमध्ये बुधबार निणर्ायक मण्डलद्वारा पहिलो चरणमा उत्कृष्ट २५ कविता छनोट गरिएको हो ।

वैशाख २२ गते शुक्रबार २५ कविहरूले वाचन गरेपश्चात् कूल अङ्क गणना गरिने र अन्तिम निर्णय सार्वजनिक हुने संस्थाका उपाध्यक्ष तथा कार्यक्रम संयोजक मीनप्रसाद लामिछानेले बताउनु भयो । प्रतियोगितमा प्रथम १५ हजार, द्वितीय १० हजार, तृतीय ५ हजार तथा सान्त्वना २ जनाले जनही ३ हजारका दरले नगद पुरस्कार तथा प्रमाणपत्र प्राप्त गर्नेछन् ।

हास्यव्यङ्ग्य कवितामार्फत् समाजमा रहेका वेथिति तथा विसंगतिका विरुद्ध प्रहार गर्दै उन्नत समाज निर्माणमा सघाउ पुग्ने सिस्नुपानी मकवानपुरका अध्यक्ष राजकुमार लामिछानेले बताउनु भयो ।

यो प्रतियोगिता हेटौंडा उपमहानगरपालिका वडा नं. ४ को प्रवर्द्धनमा सञ्चालन हुन लागेको हो । स्थानीय सरकारले बाटोघाटो, पुलपुलेसा र भवनलाई मात्र विकास ठान्न नहुने र शिक्षा, साहित्य, कला जस्ता क्षेत्रमा लगानी गरे बौद्धिक व्यक्तित्व उत्पादनमा जोड पुग्ने अध्यक्ष नवीन सिग्देलले बताउनु भयो । साथै कार्यक्रमलाई मिडिया पार्टनर साहित्य पोस्ट र हास्यव्यङ्ग्य पार्टनर फित्कौलीको साथ रहेको छ ।

सिस्नुपानी नेपालका अध्यक्ष लक्ष्मण गाम्नागेले हास्यव्यङ्ग्यमा पुराना पुस्तालाई सम्मान र नयाँपुस्तालाई आकर्षण गर्नमा सिस्नुपानी हेटौँडाको अनुकरणीय योगदान रहँदै आएको बताउनु भयो । सिस्नुपानी मकवानपुर तथा कविता प्रतियोगिताका सन्दर्भमा सिस्नुपानी नेपालका अध्यक्ष लक्ष्मण गाम्नागेले भन्नुभयो- सिस्नुपानी नेपाल मकवानपुरले हास्यव्यङ्ग्य साहित्यको प्रवर्द्धनका लागि गरिरहेका कामहरू अत्यन्त सह्राहनीय रहेको र संस्थाको २६ औं वार्षिकोत्सवलाई भव्य बनाउन आयोजना गरिएको राष्ट्रव्यापि हास्यव्यङ्ग्य कविता प्रतियोगिताले यस क्षेत्रमा उत्साहवर्द्धक हलचल ल्याएको अनुभव भएको तथा नयाँनयाँ प्रतिभाहरू जन्माउन यो प्रतियोगिताले महत्वपूर्ण भूमिका खेल्नेछ ।

विभिन्न सिस्नुपानी नेपाल मकवानपुरका संस्थापक आर.सी. रिजालले सिस्नुपानी मकवानपुर र साहित्य संगमका नाममा दिनु भएको जग्गामा संस्थाको आफ्नै भवन रहेको छ । सो भवन मकवानपुरका विभिन्न साहित्यिक संस्थाहरूको साझा थलोका रूपमा विमर्श, वाचन, पुस्तक विमोचन आदि कार्यहरू नियमित हुने गर्दछ । कविता प्रतियोगिता कार्यक्रम रोयल पार्टी प्यालेस, हेटौंडा ४ मा आयोजना हुनेछ ।

सिस्नुपानी नेपालको स्थापना दिवस वैशाख १९ को अवसरमा यही वैशाख २२ गते हुन लागेको खुला हास्यव्यङ्ग्य कविता प्रतियोगितामा देशभरबाट प्राप्त कूल ८१ कवितामध्ये वाचनका लागि २५ कविता छनोट भएका छन् । छनोट चरणमा परेका कविहरूले २२ गते रोयल पार्टी प्यालेस, हेटौंडामा उपस्थित भई कविता वाचन गर्नुपर्नेछ । वाचनको अङ्क गणनापश्चात् अन्तिम नतिजा प्रकाशन हुने हुँदा अनिवार्य उपस्थितिका लागि अनुरोध गरिएको छ ।

संस्थाले प्रतियोगिताका अतिरिक्त भैरव जयन्ति, गाईगात्रा, देउसी भैलो तथा नियमित हास्यव्यङ्ग्य रचना वाचन जस्ता कार्यक्रमहरू गरिरहेको छ ।

०००
– हेटौडाबाट संप्रस पौडेल