नेपाली हास्यव्यङ्ग्य अनलाइन पत्रिका

आदरणीय सज्जन हूलमूलहरू !
फेटा र झोलामा झुल्ने झुसिले भकारीहरू,
भ्रान्तिकारी जेरीस्वारी चाटलाई फटाफट अभिवादन !

जतिसुकै धक्कु लगाएर, बख्खु फटाएर पनि नपुगिने ठाउँ मलेखु भन्नेहरू भन्ने गर्दथे भनिरहेथे भनिरहकैे छन् तर पनि हामी नपुग्ने ठाउँ भनिएको कुठाउँको चैं सङ्घारैमा पुगेका छौँ । संघार अर्थात मङ्सिरे चुनावको दोस्रो अण्डा अब फुट्ने फुट्ने ठाउँमा/समयमा हामी आइपुगेका छौँ । हामी जनताका सच्चा सेवक हौँ, हामीमाथि चक्कु चलाएर धक्कु देखाए पनि आम समुदायको भावनाअनुरूप ती चक्कुलाई मोडेर तोडेर देखाई सक्या छौँ । अब चुनाव हुन्छ एक दुई हुन्छ तीन हुन्छ नभए मान्छेका मथिङ्गलभित्र गुजुल्टिएका सर्पहरू खतराको बीनले नवीन भावशैलीका कत्थक प्रदर्शन गर्दै नाच्न थाल्ने छन् ।

यसरी यी गुजुल्टिएका सर्प नाच्न थालेपछि हाम्रो के हालत हुन्छ ? भनी सुध्याउनु होला । यो अब त मर्छ पक्का-पक्का मर्दछ तर हामी मर्नेवाला छैनाैँ । किनकि हामी प्राण अनि त्राण लकरमै कोचेर आएका हुन्छौँ । हाम्रा मम्मीले हामीले बोटल दुध चुस्दाकै बेलामा पूरकको रूपमा हाम्रो यौटा डमी पनि जुराइदिनु भा’थ्यो । आजको दिन आउँछ नै भनेर उहाँहरू भन्नु हुन्थ्यो त डमीले धान्नु धानिरहेछ । जनताको सेवा छानी छानी गर्न पाइरहेका छौँ । यो अण्डा पर्तीनिधि सभाको फन्दामा झुण्डिन हामी फेरि तयारीमा छौैँ । फन्दामा झुण्ड्याउने आमाका औलाद अनि तपाईहरू जल्लाद उर्लेर चुनाउमा भोट खसाल्न आफ्नो घरको हाँडी चिसै राखेर या खेतवारी बाँभैm राखेर त्यो दिनको तयारीमा ढुक्क भएर बस्नुस् । हामी ठिक्क परेर डाँको लगाउँछौँ, हाँको हाल्छौँ ।

हाम्रा सानिमाका छोराहरू बुद्धि सप्रेका मोराहरू धक्कुका ढ्याङ्ग्रामात्र ठोक्छन् गर्न सक्ने खट्न सक्ने कोही छैनन् । तिनले इतिहास मात्रै पढ्याछन् रट्याछन् तर सिकोको सुइरो उन्नसम्म पनि जान्या छँदैछैनन् । त्यस्ता कुरौटेहरू इतिहासमै च्यापिएर पुतलीझैँ पात भई ठेलीभित्र थन्किएर रहने छन् । हामी त सिकेर शिकार खेल्ने शिकारी हौँ । हन्तकाली ऐरावतका प्रतीक हामी भकारी हौँ । हाम्रा भकारीमा आम गरिब जनता चुनदाममा सर्वसुलभ भकुण्डो बन्न पाउने छन् । बुद्धिजीविका जीविकादाता हामी नै रहने छौँ । शोषित, पीडित किसान र मजदूरको पक्षधर हाम्रा स्वभावको अकाल/अभाव हाम्रो भकारीमा छँदैछैन । यौटामात्र भकारी खोलेमा अपार जनसागर सलहझैँ सोझिने छ । हामी नेपाललाई नव नेपालमात्र त के नयाँ नेपाल नै बनाएर छाड्ने छौँ । जहाँ नेपालीको अभाव भए तापनि श्रम र शिपका पक्षधर छिमेकीले भरिदिन सक्छौँ । यही हाम्रो खुवीलाई सर्पले आफ्नो खुट्टा आफैँले देख्न सक्ने भएरै दौतरीहरू मरिमरी चिच्याइरहेका हुन् ।

हामी एक छौँ । एकल पहिचानमा विश्वास राख्छौँ, चुनावमा अरु दल किन चाहियो ? यसैले दुई तिहाई हाम्रो भकारीमा बचत गरिदिनुहोस् । यति मात्र भयो भने पनि अरु दललाई दर्तै गर्न नपाउने यथार्थ देखाई दिन सक्ने  छौँ । हाम्रो पहिचान राम्ररी उजिल्याउने छौँ । अघिल्लो चुनावमा पड्काएर पनि भट्काएर पनि मिसावटीमा मिसिन बाध्य भयौँ विदेशी पूँजीपति दलालहरूको डरले जनता डगमगाए । हामीलाई चक्रव्यूहमा पारिएको थियो अभिमन्यूझैँ जतिसुकै स्वाँ स्वाँ गरिए पनि हाम्रा स्वास थुन्न लपलपाउँदा हातहरू ओइरिए । काम गर्न खोज्दा लाम लागेर जिउ नचल्ने गरी बाँध्न खोजिए तर पनि केही त गरेका नै थियौ होइन त ?

सधैँ सडकभरि धूलो र धुवाँको धुमधाम देखेर परिबन्द मिलाउँदै हामीले बन्दको प्रकाण्ड शैली निकाल्यौँ । वर्षको महिनावारि पारी स्वास्थ्यअनुकूल राख्ने वातावरणका लागि भुँडीफोरले ह्वेल निकाल्नेजस्तै सङ्घर्ष गर्‍यौँ । संस्थान स्वामित्वमा विना कुनै भेदभाव सबलाई समान ढङ्गले सदाबर्तको सुविधा जुटायौँ । सक्कली नक्कली नभनी डिग्री सिग्रीलाई फलामे सिक्रीमा बाँध्यौँ । साँढेको सिङ्गजुरोजस्तै लुकाएर लुक्ने कुरा हुँदैहोइन । यस उसले मङ्सिरमा हुने चुनावी मेलामा ठेलमठेला, पेलमपेला गरी पर्तीनिधि सभाको दोस्रो फुल हाम्रो झोलीमा फुत्त हालिदिनुहोस् तब देख्नु हुनेछ, हाम्रो पौरखको ल्याकत, पराक्रमको सच्चाइ । लौ त वचन यही माग्दै तामो तुलसी भाकेर अहिलेलाई बाई बाई ।

०००
काठमाडौं
सम्पर्क : ९८४१५२६६७०