नेपाली हास्यव्यङ्ग्य अनलाइन पत्रिका

सुमी लोहनी :

हुँदा खानेका केटाकेटीहरू हिजोआज ‘दशैँ आयो ! दशैँ आयो !’ भन्दै मीठो खाने अनि राम्रो लाउने आशाको रोटेपिङमा नथचुन्जेल मच्चिदै छन् ।

मित्र ! तपैँलाई दशैँआयो कि आएन कुन्नि ? तर जनतन्त्र, गणतन्त्र, लोकतन्त्र, मनपरितन्त्र आदि तन्त्रैतन्त्र आएको देशका बहुसङ्ख्यक बासिन्दाको दैलोमा दशैँको ‘द’ पनि अँह गोडो टेक्न आए जस्तो छैन । हैन, सप्पैले आयो ! आयो ! भनेको दशैँ अधिकांश देशबासीको मझेरीमा नगै कता गएछ त हँ ? भनेर यसो हेर्दा, सुन्दा, विचार्दा त जसको घरमा दशैँ नभए पनि हरेक दिन दशैँ मनाइन्छ त्यस्ता दिलदार मान्छेको घरमा पो पुगिबक्सेछ दशैँजी त !

चामलको सेतो भात खान, दुई चौटो चिची चपाउन, एकसरो नयाँ लुगा फेर्न वर्ष दिन कुरेर दशैँको प्रतीक्षा गर्नेहरूको घर आँगनमा त दशैँजीले आउन त के चिहाउन पनि मुस्किल छ । के गर्नु बडा दशैँलाई पनि बडा, बडा व्यक्तिका बडेमान्का बिल्डिङ्गमा नै आउन मन लाग्दो रहेछ । अनि दुई छाक पेटभरि खान पनि नपुग्ने भोका, नाङ्गा, गरिबगुरुवाको घरमा किन पाइलो टेक्थ्यो र ! दीनदुःखी निमुखाको थाप्लोमा त दशैँ हरेक साल ऋणको भार बनेर पो थोपरिन्छ त !

साँच्चै अहिलेको दशैँ पनि केही व्यक्तिलाई त मज्जैसँग धीत् फुकाएर आएको छ । सबैभन्दा बढी बडा दशैँ बडा व्यापारीलाई आएको छ । त्यसैले त रातारात बजार भाउ ह्वात्तै हल्केर बादलमाथि पुगी गगन चुम्बन गर्न सक्षम भएको छ । अनि अति प्रसन्न भै बडा व्यापारीका चिल्ला तालुमा घनघोर धन वर्षा गर्दैछ । त्यसैले आजभोलि हात्तीछाप नोट लिएर तरकारी किन्न बजार गयो भने तरकारी झोलाको पिँधैमा हराउछ र पकाउँदा कन्तीको झोलमा झाम्टा झल्याकझुलुकु झुल्किन्छ ।

सत्तासीनहरूलाई चाहिँ दिल खोलेरै दशैँ आएको छ । पदको सदुपयोग गर्दै देश विदेश घुमेकै छन् । निधारमा भत्ता, लत्ता, सत्ताको टीको ट्यासट्यास भएको छ । एकअर्का बीच गाली र आरोप प्रत्यारोपको जमरा सरक्कै मौलाको छ । टाउकेहरू आफ्नोे स्वार्थका लागि गरिब नेपालीको खुसी, इच्छा, चाहना, सुख, शान्ति आदि कुराको बली मज्जैले चडाउँदै छन् । यही त हो नि रमाइलो दशैँ हैन त ?

बडा दशैँलाई भव्य स्वागत् गर्न सक्नेहरूले त बडा भव्य तरिकाले बडा दशैँ मनाउनुहुने नै छ क्यार ! नसक्नेले चैँ टोलछिमेकीका घरमा म्याँम्याँ गर्दै कराउँदै आएको दशैँको मीठो आवाज सुन्दै कल्पिकल्पी र्‍याल काढ्दै भए पनि दशैँ मनाउनु होला । च्यात्तिएर झुलजस्तो बनेको झल्लर लुगाले ज्यान ढाकी ठूल्ठूला सपिङ्ग मलमा डमीले लगाएको राम्रो लुगा हेर्दै चित्त बुझाएर दशैँ मनाउनु होला । तिर्दा तिरिमिरी झ्याइँ भए पनि होस् भन्दै ऋण काढेरै भए पनि दशैँ चैँ मज्जाले मनाउनुपर्छ भन्ने सोचलाई चटक्कै बिर्सिदिनुहोला । हिङ नभए पनि हिङ बाँधेको टालो छ भन्दै महान् चाडलाई महलवासीको सिको नगरी आफ्नो खल्तीले धान्नसक्ने गरी मनाए त झनै राम्रो !

जे जसरी मनाए पनि सम्पूर्ण पाठक मित्रहरूलाई बडा दशैँको हार्दिक मङ्गलमय शुभकामना !

०००
भाटभटेनी, काठमाडौं ।