नेपाली हास्यव्यङ्ग्य अनलाइन पत्रिका

श्रीप्रसाद पोखरेल :

“कता हिँड्यौ ?”
“कता भन्नु ? आज निम्तो मानौं भनेर नि !”
“डाको न बोलायो लिँडे पुच्छर डोलायो हन तिमीलाई कस्ले निम्तो गर्‍यो ?” अस्पतालले भन्यो ।

“यहाँ हेर त ! निम्तो गरेको प्रमाण यो होइन ?” लुते कुकुरले लुतोले पक्पकी छाला उक्किएको देखायो ।
भत्केको बाटो, चुहिने छानो, दुर्गन्ध र फोहोरले पुरिएको अस्पताल लुतोले खुइलिएर मर्न लागेको कुकुर एक आपसमा भलाकुसारी गरिरहेका थिए । अहिलेसम्म कैयौँको उपचार गरिसकेको अस्पताल आफ्नै उपचार नपाएर सिकिस्त छ । तापनि अरूको उपचार गर्ने उस्को धर्म निभाइरहेको छ ।

“आफैँ त महादेव कस्ले देला वर के गर्छौ ? जाँच्ने डाक्टर, नर्स तलव नपाएर महिनौंदेखि सदरमुकाम छन् । औषधि नआएको वर्षाैँ भइसक्यो । यहाँ स्प्रिट, फिनेल त छैन” अस्पतालले अवस्थाको जानकारी गरायो ।

लुते कुकुरले रूग्ण अस्पताललाई हेर्दै मनमनै भन्यो “उसैलाइ क्यान्सर लागिसकेछ मेरो के उपचार गर्ला ?”

०००
इटहरी, सुनसरी