नेपाली हास्यव्यङ्ग्य अनलाइन पत्रिका

श्रीप्रसाद पोखरेल :

“बडा ! धनीपुर्जा ल्याउनु भयो नि ?” श्रीधरले सुकुम्बासी धनवीरलाई सोधे ।
“अँ ल्याएँ बाबु !” उनले सरल जवाफ फर्काए ।

“कत्तिको झन्झट भयो ? मेयरले त सबै सुकुम्बासीलाई मेरै पालामा धनीपुर्जा दिलाउँछु भनेर भोट मागेका थिए ।” श्रीधरले पुन चासो राखे ।

“अँ नानी ! गाउँका सबैले पुर्जा त ल्यायौँ । त्यहीँ कुरा चल्दै थियो हामीलाई दिएको पुर्जाको जग्गा त बाटो बढाउँदा सबै बाटोमै पर्छ अरे ।” उनले अनभिज्ञता जनाए ।

“हो र ? बडा ! कहिँ न कहिँ त देलान् नि !”

उनले भने, “खोइ नानी ! सबैले धनीपुर्जा पाइस् अब धनी भइस भन्छन् । दिनभरी लगाएर धनीपुर्जा ल्याएँ, राति भोकै सुतेँ ।”

०००
इटहरी, सुनसरी