नेपाली हास्यव्यङ्ग्य अनलाइन पत्रिका

यौटा भब्य महल बनाउनु थियो पैसा नपुग्ने भयो
इच्छा यो अधुरै छ पूर्ण नगरी आधा जवानी गयो
आधैमात्र भयेपनी रहर यो पूरा गरि छोड्नुछ
खै कैले कसरी कमाउनु बरु ठग्ने कला सिक्नुछ ।

यौटा जागिर खान खुब रहरथ्यो पैसो कमाइ हुने
भेटी पाती चढाउँथेँ बरु मिठा हाकिमको मन छुने
खेल्दा खुब मजा थियो, समयमा लागेन मन पढ्नु त
यौटा सर्टिफिकेट ल्याउँ कसरी चोर्ने कला सिक्नुछ ।

नेताका बरु झन् ठुला महल छन् नेता म बन्नु पर्यो
केही पढ्नु परेन खाली गफले आकाश जोड्नु पर्यो
यो गर्छु अनि गर्छु त्यो पनी सबै मै हुँ ठूलो भन्नुछ
पैसा जोड्न त जोडुँला तर अझै ढाँट्ने कला सिक्नुछ ।

व्यापारी बनुँकी बडा सहजले पैसा कमाइ हुँने
गद्दीमाथि बसेर नोठहरुको गड्डी गनाइ हुने
सोझो काम गरेर हुन्छ कसरी पैसा निकै झिक्नुछ
एक्को पाँच हुनेगरी जिनिसमा मिस्ने कला सिक्नुछ ।

ठेक्केदार बनुँ अरु ती मसिना केही नसोचुँ बरु
दिई घुस मिलाउँ फेरि गतिला ठेक्का ठुला झन् अरु
पैसाको तकिया छ ओड्न पनि त्यै पैसैमहाँ बस्नुछ
खोक्रो भित्र बनाइ लेप कसरी दल्ने कला सिक्नुछ ।

गौरादह, झापा