नेपाली हास्यव्यङ्ग्य अनलाइन पत्रिका

कमिसन खादै आयो विदेशको कार
स्वदेशमा नबनेको बेकारको कार ।
पूर्व जाला भन्दाखेरि पश्चिमतिर जान्छ
उत्तर जाला भन्यो फेरि दक्षिणतिर तान्छ ।

मुलुकले भित्र्याएको अष्टावक्री कार
डिजेलमा नचलेर खान्छ परिकार ।
चालक झन् खाँदाखाँदै बङ्गुरकै भयो
मोटरको गति झनै पछाडि पो ! गयो ।

जति ड्राइभर फेरे पनि बाङ्गोटिङ्गो जान्छ
कार जल्ले हाँके पनि साङ्गोपाङ्गो खान्छ ।
हन्तकाले कार सधैँ बेकारमा गुड्छ
लुँड्याएर खान्छ जल्ले त्यसकै भुँडी फुट्छ ।

भुँडी फुट्नुभन्दा पैले कार फेर्नुपर्छ
जनताले खटाएको काम टेर्नुपर्छ ।
आफ्नै सीप, जाँगरमा बनाउनुपर्छ
जनताको चाहनामा चलाउनुपर्छ ।

कोही भन्छन् ड्राइभर फेरे हुन्छ कि त कतै
किन हुन्थ्यो ? भ्वाँङ मात्र भए जताततै ।
गुरुजी र मोटरको हुन्छ साँठगाँठ
दुवैलाई फेरेपछि मिल्छ छाँटकाँट ।

खान मात्रै जानेको कार
फाल्नुपर्छ के पाल्नु बेकार ।।

काठमाडौं