नेपाली हास्यव्यङ्ग्य अनलाइन पत्रिका

थोत्रा भाषण गर्न पर्दछ जहाँ जान्दैन गर्नै भने ।
गर्ला खै कसरी विकास अब ता भो’ देश यो भासिने ।।
धोकी मद्य रहन्छ नाच्छ नकटी खोजेर रम्ने दिन ।
स्वार्थी धूर्त हुँदाहुँदै मुलुकमा लौरो जितायौ किन ? ।।१

गिट्टी खान्न सिमेन्ट खान्न कपटी बानी खराबी पन ।
लुट्ने आदत छैन घूस यसले खाला कसोरी भन ।।
चिन्ता गर्दछ देशको यदि भने सक्दैन यल्ले लिन ।
स्वार्थी धूर्त हुँदाहुँदै मुलुकमा लौरो जितायौ किन ? ।।२

छोरा भाइ दिदी भदा र भतिजा पत्नी बुहारी मिली ।
मन्त्री साम्सद उच्च यी पद सबै मान्दैन बाढ्नै छलि ।।
कल्ले चिन्दछ खै सदा सचिवमा राख्दैन मान्छे चिन ।
स्वार्थी धूर्त हुँदाहुँदै मुलुकमा लौरो जितायौ किन ? ।।३

ढाँट्ने आदत कत्ति छैन ननिको बानी कुनै घातकी ।
बोल्ने खै कसरी इमान छ भने होला र के पातकी ।
यस्ताको भर छैन बड्छ गरिमा मान्छन् सबैले घिन ।।
स्वार्थी धूर्त हुँदाहुँदै मुलुकमा लौरो जितायौ किन ? ।।४

हत्याका घटना कतैतिर कसै गर्दै नगर्ने कुरा ।
यस्ता पामरले चलाउँछ यहाँ गर्छन् कुरा माकुरा ।।
कल्ले मान्दछ गर्छ काम कसरी जान्दैन कैल्यै लिन ।
स्वार्थी धूर्त हुँदाहुँदै मुलुकमा लौरो जितायौ किन ? ।।५

सन्तोषीनगर, कलङ्की, काठमाडौं