जगदीश्वर पाेखरेलसबै पाका मान्छे …
यिनैको सेवामा भर दिन सके आल्ह्वाद हुन्थे कति । धरामा रोपेमा लहलह हुँदै फल्ने थियो ओखती ।। हिँडाए धर्तीमा सबल बनियो आलोक उत्साहका । सबै पाका मान्छे अनुपम खुदा हुन् यो धराधामका ।।
जगदीश्वर पाेखरेल :
खपे गर्मी जाडो ऋतु अयनमा सन्तानका खातिर ।
सुते आधा भोकै निशदिन खटे विश्वास को गर्छ र ।।
सिकाए मायाले चलन कुलका औतार हुन् रामका ।
सबै पाका मान्छे अनुपम खुदा हुन् यो धराधामका ।।१
सुनाए बाबाले ललित कविता सुन्ने मिल्यो औसर ।
खुवाइन् आमाले पलपल भुजा खेल्ने थिए दौँतर ।।
दिए शिक्षादीक्षा हरपल थिए आस्था र विश्वासका ।
सबै पाका मान्छे अनुपम खुदा हुन् यो धराधामका ।।२
उकाली ओराली तरर पसिना झर्ना बगे छङ्छङ ।
समालिन् माताले कहर नभनी नाच्यौँ सदा छम्छम ।।
दुवै हाम्रा दाता हृदय टुकुरा सम्पूज्य सन्तानका ।
सबै पाका मान्छे अनुपम खुदा हुन् यो धराधामका ।।३
झरी वर्षा खप्दै प्रतिदिन डटे जस्तै गरी गण्डकी ।
भनी लालाबाला विभव भवमा घोटे सबै जिन्दगी ।
खने बाटोघाटो श्रम कति गरी सन्मार्ग आदर्शका ।
सबै पाका मान्छे अनुपम खुदा हुन् यो धराधामका ।।४
यिनैको सेवामा भर दिन सके आल्ह्वाद हुन्थे कति ।
धरामा रोपेमा लहलह हुँदै फल्ने थियो ओखती ।।
हिँडाए धर्तीमा सबल बनियो आलोक उत्साहका ।
सबै पाका मान्छे अनुपम खुदा हुन् यो धराधामका ।।५
०००
पाउँदीबजार, लमजुङ
लोकप्रिय फित्कौली डटकमले नेपाली भााषा, साहित्य, कलाको उन्ननयनमा अतुलनीय योगदान पुऱ्यइरहेको छ । प्रधान सम्पादक नरनाथ लुइँटेलको योगदनलाई सम्मान गर्दछु । सामााजिक कार्यमा समर्पित हुनु भनेको चानचुने कुरा होइन छाती ठुलै चाहिन्छ । सर्जकका सिर्जना भावक सामु पुऱ्याइ दिनु हुन्छ । ओझेलमा परेका सर्जकलाई प्रकाशित गरिदिनु भएको छ । भावकले पढ्न पाउँछन् । कविता प्रकाशित गरिदिएर विश्व व्यापी बनाइदिएकोमा फित्कौली परिवारमा हार्दिक आभार ज्ञापन गर्दछु ।