नेपाली हास्यव्यङ्ग्य अनलाइन पत्रिका

जगदीश्वर पोख्रेल :

वंश रत्न हो भनी सहर्ष गर्व गर्दथे ।
जे अभाव छन् बुझी तुरुन्त पूर्ण भर्दथे ।।
चित्त शान्त होस् सधैँ अगम्य गम्य शक्ति हुन्
स्नेहले हँसाउने बुबामुमा सुखी रहून् ।।१

दिव्य धाम तीर्थ हुन् स्रोत शक्ति प्रेरणा ।
शिष्ट सभ्यता दिने छरेर नित्य चेतना ।।
स्रोत मूल ज्ञानका विशिष्ट निष्ठ भक्ति हुन् ।
स्नेहले हँसाउने बुबामुमा सुखी रहून् ।।२

चन्द्र, सूर्यतुल्य छन् कर्म दिव्य जोशिला ।
बातबातमा खुवा दिने सदैव पोसिला ।।
कर्म धर्म गर्दछन् पवित्र भाव आँत हुन् ।
स्नेहले हँसाउने बुबामुमा सुखी रहून् ।।३

भ्रष्टवाद घात हो चरित्र राख शुद्धता ।
सानमान बढ्दछन् चुलिन्छ सभ्य सभ्यता ।।
वंशका प्रमोह यी सुरम्य लोकमार्ग हुन् ।
स्नेहले हँसाउने बुबामुमा सुखी रहून् ।।४

राष्ट्रवादले सदा मिलेर राष्ट्र हाँक्दछ ।
भक्ति शक्तिको दियो अजस्र बाल्नुपर्दछ ।।
ईशतुल्य छन् सदा सुपूज्य पूज्य आँट हुन् ।
स्नेहले हँसाउने बुबामुमा सुखी रहून् ।।५

०००
लमजुङ, हाल- सन्तोषीनगर, कलङ्की