नेपाली हास्यव्यङ्ग्य अनलाइन पत्रिका

जगदीश्वर पाेखरेल :

विशाल गर्भ गेहमा लिएर बूँद पाल्नुभो ।
अनेक कष्ट यातना सदैव दूर फाल्नुभो ।
सशक्त शक्त छन् मुमा सुभाव भाव भावना ।
समस्त मातृशक्तिमा हजार लाख वन्दना ।।१

अनन्त स्नेह मातृले दिएर जन्म पाइयो ।
चुसेर वक्ष मातृको सुधा मिठो अघाइयो ।।
दिएर स्नेह पाल्नुभो सहेर कष्ट वेदना ।
समस्त मातृशक्तिमा हजार लाख वन्दना ।।२

मुसी र स्यालको कथा सुनेर माम खाइयो ।
सुतेर मातृ गोदमा पला पला निदाइयो ।।
घरी घरी मुमा जपेँ छदै छ दिव्य सम्झना ।
समस्त मातृशक्तिमा हजार लाख वन्दना ।।३

विक्षिप्त भोक प्यासमा मुमा भनी कराइयो ।
मुमा कता गयौ भनी विलाप लाप गाइयो ।।
असीम शक्ति चेतना अगाध स्नेहकी मुना ।
समस्त मातृशक्तिमा हजार लाख वन्दना ।।४

मुमाविना वसुन्धरा उराठ लाग्छ जे गर ।
मुमा हुँदा धरा गरा भरी म देख्छु ईश्वर ।।
विशिष्ट स्नेहकी धनी उदार सोच चिन्तना ।
समस्त मातृशक्तिमा हजार लाख वन्दना ।।५

०००
पाउँदीबजार, लमजुङ