नेपाली हास्यव्यङ्ग्य अनलाइन पत्रिका

जगदीश्वर पाेखरेल :

लेक बेँसी गर्दछन् डोका र नाम्ला दैनिक ।
देश रक्षा गर्दछन् देशका हाम्रा सैनिक ।।
शीत थोप फूलमा झर्नेछ मैना माघमा ।
कोपिला मास्ने बढे के फूल फुल्लान् बागमा ।।१

वास बस्छन् कोइली आएर मौवा बोटमा ।
फूल लाली टल्कियो छायर कालो कोटमा ।।
तार तान्दा घन्कियो आलाप रन्क्यो रागमा ।
लात हान्ने छन् कुनै के फूल फुल्लान् बागमा ।।२

नीर पाए फूलको हाँस्ने छ लाली जोवन ।
लट्ठ माली पर्दछन् पाएर काले मोहन ।।
पूर्व लाली देखियो मुस्कान छर्दै वन्दना ।
बोटमा जालो माकुरा के फूल फुल्लान् बागमा ।।३

देश हाँक्ने देशको गर्दै न माया सम्झन ।
दुष्ट वैरी देखियो ताक्दै छ प्यारो आँगन ।।
आश गर्नेहरू छन् नेपाल बोक्ने भावना ।
घात गर्ने छन् यहाँ के फूल फुल्लान् बागमा ।।४

कर्मवादी माहुरी नेपाल जोत्दै बस्दछन् ।
स्वार्थवादी घातकी नेपाल डस्ने गर्दछन् ।।
वृक्ष काट्ने बन्चरो गर्दै न माया याचना ।
बोट भाच्ने गर्दछन् के फूल फुल्लान् बागमा ।।५

०००
लमजुङ