नेपाली हास्यव्यङ्ग्य अनलाइन पत्रिका

काठमाडौं । फेमकुमारी डोरनाथ ढुङ्गेल साहित्य प्रतिष्ठानको आयोजनामा साहित्यकार राममणि ढुङ्गेलको ‘चमत्कृती’ एकाङ्कीसङ्ग्रहको लाेकार्पण गरियाे ।

कार्यक्रम युनियन हाउस अनामनगरमा समारोहमा सुसम्पन्न भएको हाे ।

फेडोल साहित्य प्रतिष्ठानका सल्लाहकार रामप्रसाद पन्त सभापति र प्रा डा गोविन्दराज भट्टराईको प्रमुख आतिथ्य रहेको कार्यक्रमको विशेष आतिथ्य प्रा डा कुमार कोइराला, डा हरिप्रसाद सिलवाल, डा रमेश शुभेच्छु र विमला तुम्खेवाले गर्नुभएको थियो ।

अतिथिलाई रुद्राक्ष माला, राष्ट्रियगानसँगै प्रमुख अतिथिद्वारा पानसमा दीप प्रज्वलन गरि कार्यक्रमको उद्वघाटन गरिएको थियो ।

समारोहमा वरिष्ठ कलाकार नगेन्द्र पौड्यालले मन्तव्य मार्फत पाहुनालाई स्वागत गर्नुभएको थियो । तत्पश्चात नाटककार राममणि ढुङ्गेलको पुस्तक चमत्कृतिको लोकार्पण गरियो । यस पुस्तकका बारेमा साहित्यकार विमला तुम्खेवा, डाक्टर रमेश शुभेच्छु र डाक्टर हरिप्रसाद सिलवालले चर्चा गर्नुभएको थियो ।

विशेष अतिथि कुमार कोइरालाले राममणि ढुङ्गेलको शक्तिशाली नाटक लेखनको प्रशंसा गर्नुभयो । ताजा दर्शक प्रतिक्रिया मन्तव्य राख्नुहुने वरिष्ठ साहित्यकार प्रह्लाद पोखरेलले लेखकले उत्कृष्ट कृति नेपाली साहित्यलाई दिएको उल्लेख गर्नुभयो ।

प्रमुख अतिथि गोविन्दराज भट्टराईले राममणिको नाटक लेख्ने कला राम्रो भएको उल्लेख गर्दै बधाई ज्ञापन गर्नुभयो ।

लेखक ढुङ्गेलले आफ्नो निमन्त्रणालाई स्वीकार गर्दै समारोहमा उपस्थित सबैलाई धन्यवाद ज्ञापन गर्नुभएको थियो ।

समारोहका सभापति रामप्रसाद पन्तले प्रतिष्ठानको सल्लाहकारको हैसियतले यति भब्य समारोहको सभापति हुने सौभाग्य मिलेकोमा खुसी व्यक्त गर्नुका साथै लेखक ढुङ्गेललाई बधाई दिँदै कार्यक्रम समापन गर्नभयो ।

उक्त कार्यक्रम सञ्चालन डिल्लीप्रसाद मूलतिहुनले गर्नुभएको थियो ।

०००
डिल्लीप्रसाद मूलतिहुनकाे साैजन्यमा