नेपाली हास्यव्यङ्ग्य अनलाइन पत्रिका

सिद्धान्त विचारहरू सब हापिस्
आफ्नै जहानको फोटो छापिस्
संघीयताले नेता भतुवा बनाइस्
गणतन्त्र तँ आएर अरू के नापिस् ?

आफ्नै गुटगिरोहको दल बनाइस्
आफ्नै आसेपासेका महल ठडाइस्
कतै भट्टी त कतै रिसोर्ट खुलाइस्
गणतन्त्र तँ आएर अरू के नापिस् ?

कर्मी मौरी जति बाहिर पठाइस्
माखा भ्यागुताहरू जम्मा गराइस्
जात जातिहरू बीच खुब लडाइस्
गणतन्त्र तँ आएर अरू के नापिस् ?

अनेक अनेक पदका पंक्ति बढाइस्
ऋणमाथि ऋणको थुप्रो चढाइस्
महँगा महँगा थुप्रै गाडी किनाइस्
गणतन्त्र तँ आएर अरू के नापिस् ?

भोग विलासमा वर्तमान नारिस्
स्वणर्िम भविष्य अन्धकार पारिस्
दुःखदर्दबाट यहाँ कल्लाई तारिस्
गणतन्त्र तँ आएर अरू के नापिस् ?

मन्त्रीकी श्रीमतीलाई सुन किनाइस्
उनका बाबुआमालाई ऊन किनाइस्
त्योभन्दा अरू कहाँ को चिनाइस्
गणतन्त्र तँ आएर अरू के नापिस् ?

राजतन्त्र हटाइस् रजौटा पालिस्
शानमान खोज्दै कुकृत्य थालिस्
विदेशी प्रभुवानको गर्दै मालिस्
गणतन्त्र तँ आएर अरू के नापिस् ।

द्रष्टव्य : टेकबहादुर थापाका नाममा रहेका कविताको शीर्षकीय मुख्यांशलाई आधार बनाएर समस्यापूर्तिको शैलीमा रचिएको अनुकरणात्मक कविता ।