नेपाली हास्यव्यङ्ग्य अनलाइन पत्रिका

गोठालाहरू हो
तयारी गर
यस पालि पनि
गोरुतिहारको छेक पारेर
केही भिमसिने बोकालाई
अघिपछि लगाई
तिम्रा गोठतिर
तिम्रा टोलटोलमा
उही पुरानै छाडा साँढे
आउँनेछ
साथमा
झर्ला र खाउँलाको लोभमा
पछि लागेको
स्यालको हुल
साँढेको जयगानको
तुमुल ध्वनिमा
वरिपरिबाट कराउनेछ
साँढेको एकाधिकारगान
अविरल गाउनेछ
तैपनि वास्ता नगरी
साँढे लुसु लुसु आउनेछ
गाउँठाउँका साना बहरहरूलाई
बाच्छीहरूलाई
सके फकाउनेछ
नसके सताउनेछ
फिँज गजगज निकालेर
उघ्राउनेछ
साँढेको प्रतापबाट
अभिभूत बाच्छा बाच्छीको समाज
जयकारका साथ
ताली बजाउनेछ
यसको बदलामा साँढे
आश्वासनको राग
उघ्राउनेछ
साँढेतिहार सकिएपछि
पुरानै गोठतिर फिर्ने
मन बनाउनेछ
साँढे पुरानै थलामा
ठुलो रास लगाएर
गोब्यार्उनेछ
हेरिराख्नुहोला
साँढेतिहारको कुँडो खान
साँढे आउनेछ ।

०००

भद्रपुर, झापा