शिवप्रसाद जैशीदासको दास, दास
त्यो दास त्यहाँ बसेको कुर्सी दास त्यसको कार्यकर्ता दास त्यसको नेता दास । चारैतिरबाट आवाज फर्किन्छ दास दास दास दासले दासलाई दास भनेपछि ।
दासले दासलाई दास भनेपछि
दास दासहरूको होडबाजीमा
दासको प्रतिस्पर्धात्मक दौडमा
दासले दास हुन आस मानेपछि
कसको पो शिरमा श्रीपेच हुन्न र ?
श्रीपेचको दासत्वबाट उम्कन खोज्नेले
श्रीपेच विहिन खप्परको हुकुमतमा
लगौंटीले छोपेको आङ् तनक्क तन्काउँदै
धनुष्टाङ्काररूपी जयजयकारको आवाज
कसलाई पो कणप्रिय नहोस् ?
कसलाई पो मन नपरोस् ?
आवाजको सपनीमा श्रीपेचको पहिरनले
कम्मरमुनि ढोग्ने जमातको जयजयगानमा
समूह समूमा हुने जयजयकारमा घेरिने
सौभाग्यवादीहरूमा
कसलाई मन छैन महाराज हुन ?
जय नेपाल महाराज !
लालसलाम महाराज !
जयजय सरकारी जग्गा हड्पौँ महाराज
जयजय भ्याट छलौँ महाराज
जयजय कर छलौँ महाराज
महाराजको जयजय गान हुँदा
को महाराज बन्दैन र ?
वार्ड राजा
पालिका राजा
जिल्ला राजा
पिर्के सालामी राजा
राष्ट्रका राष्ट्र महाराजा
साथ समर्थहरूका बडामहाराजाको
गायनको भावनमा
को पो नबन्ला बडामहाराज !
दासको खुट्किलामा
दासको सोपानमा
दासको संरचनामा
दास बन्ने स्वतन्त्र होडबाजीमा
कुन चाहिँ विदेशी खुसी नहोला
बडामहाराज दास बन्न खोजे
बडा महाराजलाई दास बनाउन पाए ।
दासहरूको बगालबाट आवाज गुन्जिन्छ
हैट, म दासत्व स्विकार्दिन
त्यो दास
त्यहाँ बसेको कुर्सी दास
त्यसको कार्यकर्ता दास
त्यसको नेता दास ।
चारैतिरबाट आवाज फर्किन्छ
दास दास दास
दासले दासलाई दास भनेपछि ।
०००
कैलाली, हाल काठमाडौं
Subscribe
Login
0 Comments
Oldest
