नेपाली हास्यव्यङ्ग्य अनलाइन पत्रिका

देखाएर ढेँडुले आशा
भ्रष्टाचार गरेर तमासा ।
दक्षिणको हनुमान पहिले
पश्चिमका हली झैँ अहिले ।

मुलुक नै राइफाँडो पारेर
खाने भए तावामा तारेर ।
“…धन प्यारो” उखान जनाए
माछो-माछो भ्यागुतो बनाए ।

गोकुलमा भेटिए चोर
एक खरब सत्तरी करोड ।
हनुमान शहरमा पसेर
खान थाले झ्यालैमा बसेर ।

पशुपति, स्वयम्भू चकित
बस्नखानै नदिने हो कि त !
झार्छु भन्थे आकाशका तारा
झार्ने भए मान्छेका बङ्गारा ।

भागबन्डा लाएर खाए
दुनियालाई तमासा देखाए ।
शिरमाथि चढेर लाखु
जन-धन बनाए तमाखु ।

०००
नागार्जुन न.पा. १, रानीवन, काठमाडौं
९८४१४९१०८१