नेपाली हास्यव्यङ्ग्य अनलाइन पत्रिका

मलाई पनि अब फाटेको पेन्ट लाउँ जस्तो भो
रक र पपमा अङ्ग्रेजी गीत गाउँ जस्तो भो
दायाँ र बायाँ कानमा फलामे कुण्डल झुण्ड्याएर
खुट्टा बजार्दै गिटार बजाउँ जस्तो भो
किनकि चुनाव पछि त
केटाहरू
बूढो भनेर पो हेप्न थाल्यो !

कसो !
आँच ब्रो भन्दै हिनेपछि
बिरङ्गी सुज किनेपछि
पुठ्ठाभन्दा तल पेन्ट सारेर
एउटा बाउला माथि एउटा तल झारेर
औंलाभरि बजारे औंठी पिनेपछि
कसको हिम्मत मलाई सुड्डो भन्ने
पिण्ड खाने उमेरको भनेर नगन्ने ?
मलाई पनि जिब्रो बटारेर भाका बनाउँ जस्तो भो
चुरोटको सुर्ती झारेर मडुवा भरी खाउँ जस्तो भो
झम्के रुमाल घाँटीमा बेरेर
हिन्दी र्याप सुनाउँ जस्तो भो
किनकि चुनाव पछि त
केटाहरू
बूढो भनेर पो हेप्न थाल्यो !

पाखुरामा त्रिसुल डामे झैं
टाटु बनाउँ जस्तो भो
समसाँझैं मधुशालाबाट निष्किएर अलिअलि गनाउँ जस्तो भो
बिना हेल्मेट ट्राफिक छलेको सान दिएर
चार जाना चढेर दादागिरीको ट्याग लगाउँ जस्तो भो
ब्याक पकेटमा मोटो पर्स खाँदेर
हातमा दानेमाला बाँधेर
धूनी जगाउँ जस्तो भो
किनकि चुनावपछि त
केटाहरू
बूढो भनेर पो हेप्न थाल्यो !

अझै पनि आँतमा हिम्मत छ
गुजराँती भैंसीको दुध खाएको तागत छ
अझै पनि बारी खन्न सक्छु
स्तोत्रहरू कण्ठस्थ भन्नसक्छु
कम्प्युटरमा उस्तै औंला चलाउँछु
अन्ताक्षरीमा मै हुँ भन्नेलाई गलाउँछु
बाजा बजाउँछु
बगैंचामा फूल सजाउँछु
साहित्य र राजनीति बुझ्नसक्छु
धर्म दर्शन पर्गेल्न सक्छु
पठ्ठाहरू केही नजानी जान्ने भएका छन्
दारी पाल्दैमा
बुज्रुक भइन्छ भन्ने ठान्नेभएका छन्
बूढा हुँदैमा केही गर्न नसक्ने हुँदैन
कपाल फुल्दैमा बाजे भनेर गनिदैन
पाली टोपी पछाडि फर्काउँ जस्तो भो
कपाल रङ्गाएर लर्काउँ जस्तो भो
किनकि चुनावपछि त
केटाहरू
बूढो भनेर पो हेप्न थाल्यो !

०००
गौरादह, झापा