नेपाली हास्यव्यङ्ग्य अनलाइन पत्रिका

अरिङ्गाल, बारुलाले डस्न थालेका छन्
मौरी खाई घारभित्र बस्न थालेका छन् ।
मात्तिएर मलसाँप्रो उफ्रिएर आयो
भत्काएर घारलाई मह-मौरी खायो ।

चितुवाले सताएर नानाभाँति गर्‍यो
गाई मारी गधा पोसी आफ्नै भुँडी भर्‍यो ।
निर्धालाई घचेटेर बलिया चैँ जागे
गाईप्राणी डराएर पीडा भोग्न लागे ।

लामखुट्टे र उपियाँले सताउन थाले
बाघ जस्ता बनी मान्छे बिताउन थाले ।
बाज बने मान्छे कोही डराउँदै गए
डाँफे चरी बनेलीमा हराउने भए ।

हलो छोडी गोरु आए नीति बनाउन
भेडाहरू भेला भए थाले सघाउन ।
गधाले पो ! प्रजातन्त्र चलाउन थाल्यो
प्रजालाई पन्छाएर अघाउन थाल्यो ।

ठूला माछा सुरिएर सानालाई खान्छन्
मान्छेलाई पाएसम्म दुलाभित्रै तान्छन् ।
पिराहाको पावरले गर्नसम्मै गर्‍यो
मिचाहाको अधीनमा मुलुक नै पर्‍यो ।

०००
नागार्जुन न.पा.-१, रानीवन, काठमाडौँ
९८४१४९१०८१