नेपाली हास्यव्यङ्ग्य अनलाइन पत्रिका

बाँस निहुरिन्छ
अग्लो हुनु भनेको
निहुरिनु पनि हो ।
जन्मदा चाहिने
मर्दा चाहिने
मलाई बाँस मन पर्छ ।
बाँस नुहाउनु
र,
हाँगा काटेर घाँस बनाउनु
बाँस काट्नु
र,
बाँसको घर बनाउनु
अर्थात् घाट पुग्ने खट बनाउनु
तर,
बाँससँग नजिस्कनु ।
बाँस निहुरियो भनेर
धेरै नझुकाउनु
पड्किन्छ
र,
चिउँडो फुकाल्छ ।
बाँस झ्याङ्गियो भनेर
हतियार नलगाउनु
तामा/ टुसो हालेर मौलाउँछ ।
अर्थात्,
बाँसले जीवनको गीत गाउँछ
बाँससँग नजिस्कनु
बाँस आफू खोपिएर पनि मिठो धुन सुनाउँछ ।
बाँसलाई नखोपेर
बन्दुक बनाउने यो मुलुकमा
म बाँसुरी खोप्ने गोठालाको जन्म पर्खिरहेछु ।
र, मेरो शासक समयदेखि तर्सिएर
ऊ आठौँ गर्भको त्रास बाँच्न थालेको छ।
के फेरि समयले अर्को कृष्ण जन्माउन सक्दैन र ?

म समयसँग
सत्यमा बाँसुरीको धुन मागिरहेछु ।

०००
दमक, झापा