नेपाली हास्यव्यङ्ग्य अनलाइन पत्रिका

उसले सारीका कुरा गरेर
मेरो बगली खाली पारी
मैले दारुका कुरा गरेर
उसको नौगेडी हात पारेँ
लेनादेना बराबर नै भो
चर्कने र झर्कने पनि भो
विवाद र झगडा अलिअलि
मान्छे म तगडा घरीघरी
सधैं व्रत बस्नु भन्छे ऊ
म सधैं खाने कुरा गर्छु
विचार फरक भएपछि
चुल्हो पनि फरक पर्ने रहेछ
पहिले म घन्टी बजाउँथे
अहिले ऊ घन्टी बजाउँछे
विचार फरक भएपछि
गन्हाउदो रहेछ मान्छे
सहरको दुर्गन्ध झैँ
मन नमिलेपछि
हाम्रो भान्सा फरक भो
कम्युनिस्टहरूको विचार झैँ
अदालतमा मुद्दा परेपछि
लन्ठ्याङ भो जिन्दगी
चुनाव हारेको नेता झैँ ।
नाथे विचारले
सम्बन्धमा धमिरा लगायो
खाएका कसम सबै बगायो
मधुशाला थियो जिन्दगी
अहिले वधशाला बनायो
सारी र दारुले जिन्दगी
ऐँजेरु बनायो ।

०००
ओखलढुङ्गा