नेपाली हास्यव्यङ्ग्य अनलाइन पत्रिका

नेपाल सरकारको बसमा
कोही तानिएका छन्
कोही छानिएका छन्
कोही तारिएका छन्
कोही झानिएका छन्
सबै एक से एक छन्

ताछेर सुन्तला ठानी
क्वाप्प मुखमा हाल्छन्
केराको गुदी निल्छन्
बोक्रामा अरुलाई चिप्ल्याउँछन्
बार्दलीमा घाम ताप्छन्
गर्मी लागे शीतल पार्छन्

बाटोको मादल झैँ
बसको हर्न बजाउँछन्
आआफ्नै तालमा रमाउँछन्
कोही धकेल्छन्,कोही तान्छन्
कोही रिसाइ ओर्लेर जान्छन्
नेपाल सरकारको बसमा
कोही सिट फेर्न खोज्छन्
कोही रङ्ग दल्न खोज्छन्
काउसो छर्छन्
खोर्सानीको धुलो हान्छन्
कस्ता कस्ता यात्रु चढ्छन् ?

कोही निदाउँछन्, घुर्छन्
ठेलमेल गर्छन् तथानाम बोल्छन्
तेल चोर्न खोज्छन्
ड्राइभर फेर्न खोज्छन्
कोही यता घुमाउनु भन्छन्
कोही उता घुमाउनु भन्छन्
भोक लाग्यो खाजा ले भन्छन्
बिहानको हैन ताजा ले भन्छन्
टिकट माग्छन् उधारो भन्छन्
नेपाल सरकारको बसमा
कस्ता मान्छे चढ्छन् ?

०००
ओखलढुङ्गा
सम्पर्क : ९८४३०५४१६१