नेपाली हास्यव्यङ्ग्य अनलाइन पत्रिका

मैले भोगेको देशमा,
राजनीति छैन,
राज्यको नीति,
राज्य चलाउँने नीति,
राष्ट्र निर्माण र समृद्धिको नीति,
नितिहरूको मुलनीति,
अर्थात राजनीति ॥

त्यहाँ राज्य व्यवस्था पनि छैन,
अस्तव्यस्त व्यवस्था,
अर्थात अव्यवस्था छ,
लुटतन्त्र छ,
झुटतन्त्र छ,
छुटतन्त्र छ,
फुटतन्त्र र ठगवन्धन तन्त्र छ ।

चोर, डाका र ज्यानमाराहरू,
खुल्लेआम नीति बनाउँछन्,
छर्लङ्ग देखिने लाजनीति चलाउँछन्
विदेशीको हस्तक्षेप मिलाउँछन्,
र ज्यानमारालाई नाइके बनाउँछन्,
सत्ताको मात खाएर,
कुहिएको सिनो गनाउँछन् ।

देशका औंशाहरू,
सिनोमै रमाउँछन्
यदाकदा चुनाव पनि गराउँछन्
बाकस थाप्छन् तर
जनता भोट हाल्दैनन्
पिठ्ठुहरू वाकस भर्छन्
एजेण्टहरू गन्ती मिलाउँछन्
फलानोले जित्यो भन्ने हौवा पिट्छन्,
अनि डाँकाहरू चुनाव जित्छन् ।
त्यसपछि ठगवन्धन् गरेर
सत्ता थिच्छन् ।

क्या गज्जवको नीति ?
छर्लङ्गै देखिने दक्षिणे नीति,
सत्रचण्डको विदेशनीति,
सेटिङ पछिको भ्रमणनीति ।
एकादेशको लाजनीति ।

०००
काठमाडौं