नेपाली हास्यव्यङ्ग्य अनलाइन पत्रिका

शम्भु जमरकट्टेल हेदाङ्ने :

गाउँ-घरमा गुण्डाराज चर्कनु पर्छ,
कुण्डले र मण्डले फर्कनु पर्छ,
विष्ट, गिरी र सुवेदी फर्कंदैछन्,
निरङ्कुशता फर्कंदैछ,
लुकेका पञ्चहरु फर्कंदैछन् ।
काला रात, अन्याय र अत्याचार फर्कनु पर्छ,
हाे अब मरेका राजा फर्कनु पर्छ ।

मरेका लासहरु उठेपछि,
जन्मिएका तन्नेरीहरु मर्नुपर्छ,
बनेका पुल र चिल्ला बाटाहरु भत्काउनु पर्छ ।
टेलिफाेन, माेवाइल र टेलिभिजन फुटाउनु पर्छ,
इन्टरनेटका तारहरु चुँडाउनु पर्छ ।
वाईफाईका वेभहरु राेक्नुपर्छ,
डाक्टर, नर्स र शिक्षकलाई ठाेक्नुपर्छ,
विध्यालय र अस्पताल चलाउन राेक्नुपर्छ
उपचारमा अब ढ्याङ्ग्राे ठाेक्नुपर्छ,
विदेश गएका कामदार फर्काउनु पर्छ,
मरेका पञ्चले आन्दाेलन चर्काउनु पर्छ ।
मरेकै राजा फर्काउनु पर्छ ।

बृद्द भत्ता पनि राेक्नु पर्छ,
स्वतन्त्रता, न्याय र समानता खाेज्नेका टाउकामा
पुलिसका लाठीले ठाेक्नु पर्छ,
अब चिराग, राँकाे र मट्टितेल बाल्नुपर्छ,
लाेकतन्त्रकाे विजुली अब अब फाल्नुपर्छ ।

तस्करी, वलात्कार, हत्या र हिंसा बढ्नुपर्छ
न्याय र समानताकाे सिँढी लड्नुपर्छ ।
जनताकाे मुटु चर्कनुपर्छ,
मरेका राजा फर्कनुपर्छ ।
मानवअधिकार र समावेशिता मर्नुपर्छ,
पृथ्वीकाे गति उल्टाे चल्नुपर्छ ।
नागरिकले रैती र दास बन्नुपर्छ,
दास रैतीले मरेका लासलाई राजा भन्नुपर्छ ।

सूर्य र चन्द्र पनि अब मर्नुपर्छ,
ताराले उज्यालाे छर्नुपर्छ ।
जनताकाे शासन ढल्नुपर्छ,
तानाशाहकाे शासन चल्नुपर्छ ।
तस्करी, वलात्कार, हत्या र हिंसा बढ्नुपर्छ
न्याय र समानताकाे सिढी लड्नुपर्छ ।

जनताकाे मुटु चर्कनुपर्छ,
मरेका राजा फर्कनुपर्छ ।
ज्युँदा राजा मुर्दावाद !
मरेका राजा जिन्दावाद !!
ज्युँदा पञ्च मुर्दावाद !
मरेका पञ्च जिन्दावाद !!
जँड्याहा युवराज मुर्दावाद !
जँड्याहाका बाउकाे सपना जिन्दावाद !!

०००
काठमाडाैं