नेपाली हास्यव्यङ्ग्य अनलाइन पत्रिका

मनमा लाको कुरा किन लुकाउनु ?
धक फुकाएर भन्छु ।
एकदिनलाई पुग्दैन भने
एक घण्टालाई भए पनि हुन्छु
जसरी हुन्छ उसरी दिए हुन्छ
सुन त सरकार !
म पनि मन्त्री बन्छु ।

मन्त्री बन्नलाई,
सबै योग्यतामा अब्बल छु ।
दुई महिना पूरापूर
एउटै दलको झोला बोक्न सक्छु ।
मन्त्री बनाउँछु भन्ने दल पाएँ भने
एकैदिनमा दुईटासम्म दलमा प्रवेश गर्छु ।
बुर्जवा शिक्षाको सर्टिर्फिकेट नभएर
के भो र सरकार ?
दुई नम्बरी काम गर्नलाई
एक नम्बरी सर्टिफिकेट छ ।
मुढेबलको कुरा गर्दा
दुई चार वटा दलकै सुन्डमुन्डलाई समेत
एकैपटक हान्न सक्छु ।
ढुक्क भए हुन्छ परेको बेला
अर्को दललाई अनि
आफ्नै दललाई अन्तर्घात गर्न सक्छु ।
भन्नु न सरकार
के म मन्त्री बन्न सक्छु ?

खोट भन्ने कुरा केही छैन मसँग
एक पटक मन्त्री बन्ने अवसर पाएँ भने
देश त चलिराछ,
विदेशलाई समेत चलाउँछु ।
देशको विकास भन्ने कुरो त गलिराछ
दलको सिद्धान्त र निष्ठा पनि गलाउँछु ।
भन न सरकार भन,
मलाई मन्त्री बनाउँछु ।

दलको मात्र होइन,
दुईचार वटा मान्छे बेच्ने अफिसको लाइसेन्स छ ।
कोदो रोप्दारोप्दै नेपालमै जन्मिएको हुँ म ।
अहिले त दर्जन भन्दा बढी देशको नागरिकता छ ।
चाकडी र चाप्लुसीको आदर सत्कार गर्नलाई ।
आठ/दश भाषाको ज्ञान छ,
जसले जताबाट हेर्नोस्,
सबैलाई आफ्नै दलको भन्ने भान छ ।
सरकार यसपाली जसरी भए पनि
म मन्त्री बन्छु
नबनाउने भए पनि ‘नोट’ गर सरकार
म जसरी पनि मन्त्री बन्छु ।
कसरी भनेर फेरि नसोध मलाई
म जसरी मिल्छ त्यसरी नै मन्त्री बन्छु ।

०००
स्याङ्जा