नेपाली हास्यव्यङ्ग्य अनलाइन पत्रिका

कुनै त्यस्तो जोडी ढुकुर सरिको दम्पति नयाँ
हुने आत्मा यौटै रहर सुकिलो सम्पति नयाँ ।
गए छोडी हाम्रा युवक युवती व्याकुल बनी
भए हाम्रा चाम्रा प्रतिनिधि सबै केवल धनी ।

हुनेखाने नेता, सहरतिर विस्थापित भए
भएखाने सोझा, जन कहरमा चिन्तित भए ।
कतै छैनन् हाम्रा सबल गतिका उन्नति छुने
कुनै छैनन् नेता असल मतिका कल्मष धुने ।

कता होलान् सेता प्रगति-पथका उज्ज्जल दिशा
भए काला, राता प्रगति-रथका चञ्चल निशा ।
भयो पाल्नै पर्ने नगर मुखिया गाउँ-घरले
भयो फाल्नै पर्ने जहर सरिको साहु करले ।

गरौं राम्रो धन्दा विकसित हुने कर्म गतिलो
भनी केही भन्दा कलुषित हुने भाव भरिलो ।
भए सारा साझा प्रतिनिधि नयाँ भिन्न कसरी ?
सबै मिल्छन् खाने बखतबिचमा एक जसरी ।

जुटेका छौं हामी प्रतिदिन कला-काव्यमतमा
बगेका छौं हामी प्रचलित परिष्कार पथमा ।
चलाई चल्तीका विविध सुरिला छन्द-सरिता
बनून् त्यस्तै नेता मुलुक हितमा बन्द-कविता ।

०००
नागार्जुन-१, रानीवन, काठमाडौं
९८४१४९१०८१