नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

असंख्य कस्ट बेहोरेर
आमाले जन्म नदिएको भए
के आज तिम्रो अस्तित्व सम्भव
थियो र !

असंख्य उत्साह खर्चेर
बा ले हात समाएर
हिड्न नसिकाएको भए
के आज तिमी
आफ्नै गोडामा उभिन सक्थौ र !

वंशको जरा सम्झेर
मुस्कुराउदै
हजुर बा र हजुर आबैले
टाउकोमाथि हात राखेर
आशिर्वाद नदिएको भए
के आज तिमी शिर ठाडो परेर
हिड्न सक्थौ र !

जीवनको आकार दिने यो धरती
जीवनको प्राण भर्ने यो हरियाली
जीवनमा रस भर्ने यी खोला नालाहरूले
तिम्रो उत्पत्तिमा साथ नदिएको भए
के आज तिम्रो अस्तित्व सम्भव थियो र ?

तसर्थ,उत्पत्ति र अभ्युदय यात्राका
सृजना कर्ताहरू तथा वंशदाताहरू
स्तुत्य छन्, माननीय छन् !

दुर्भाग्य,
आज तिमी स्वार्थमा बसिभूत छौ
आफ्नो उतत्पत्तिको यथार्थमाथि
अशहिष्णुताको छुरी चलाई रहेका छौ
पुर्खाको श्रम र पौरखलाई पोलेर
आततायीहरूको गाला मुसार्न व्यस्त छौ !

तर,
आफ्नो पहिचानको चिहानमाथि
रामराज्यको सपना देख्ने को माथि उठेको छ र ?
आफ्नै पितृको सपनामाथि तीर घोपेर
कुन सन्तान सफल भएको छ र ?

०००
गोरखा