नेपाली हास्यव्यङ्ग्य अनलाइन पत्रिका

नारायण भट्टराई :

के हुन्छ तिनीहरूको इशारामा ननाँच्दा ?
मेरो जीवनको नृत्य हराउँछ ?
के हुन्छ तिनीहरूको थोत्रो ढ्याङ्ग्रो नबजाउँदा ?
मेरो जीवनको मादलको खरी झर्छ ?
के हुन्छ तिनीहरुको गन्धे गोडाको पानी नखाँदा ?
मेरो चिरहरण हुन्छ ?
के हुन्छ तिनीहरुलाइ जिउ जिउ नगर्दा ?
म भिखारी हुन्छु ?
के हुन्छ तिनीहरूको फाइदाको लागि नमर्दा ?
मैले मलामी पाउँदिन ?
के हुन्छ तिनीहरूको थोत्रो आदर्शको वकालत नगर्दा ?
मेरो आदर्शको बिउ मासिन्छ ?
के हुन्छ तिनीहरूको काइते बोलीमा बोली नमिलाउँदा ?
मेरो बोली बन्द हुन्छ ?
के हुन्छ तिनीहरूको बेमौसमी भाषणलाई ताली नबजाएर
अस्वीकृत गर्दा ?
मेरो जीवनको ताली हराउँछ ?
के हुन्छ तिनीहरूको हिड्न छोडेको बाटो हिंड्दा?
मेरो बाटो हराउँछ ?
के हुन्छ तिनीहरूलाई भगवान नमान्दा ?
मेरो आस्था गायव हुन्छ ?
मलाई सबै थोक होस् तर
सत्यको बाटोबाट जीवनको बहान
अन्त मोड्नु नपरोस् ।

०००
हाल अमेरिका ।