नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन :

बूढापाकाहरूलाई बाँचेभत्ता दिलाउँला
स्वर्गवास भएदेखि घाटमा भेट्न आउँला । (८१)

म युवायुवतीलाई विदेशमा धपाउँछु
तिनैका पसिना चुस्न यहाँ म मुख बाँउछु । (८२)

स्वास्थ्य संस्थाहरू खोल्छु रोगी दिन्न जचाँउन
दिन्छु मैले सधैं ध्यान निरोगी नै बचाउन । (८३)

म चाहिँ रोगले ग्रस्त भएँ भन्न रुचाउँछु
राज्यको धनले जाँच्न विदेशतिर धाउँछु । ( ८४)

नराम्रो रोग लागेको सकेको स्वाङ पार्दछु
उपचार भनी सक्तो राष्ट्रकोष निखार्दछु । (८५)

भित्रभित्रै सकेसम्म देश बिमार पार्दछु
रोगीको नाम बेचेर आफ्नै थैलो सपार्दछु । (८६)

गर्छु स्याहार नारामा अशक्त र अपाङ्गको
जितेँभने सबै नारा भुल्छु याद रहन्न त्यो । (८७)

चुनाव आउँदाखेरि हरेक घर डाक्टर
पुर्‍याउने म नै हुन्छु अरूले गर्न सक्छर । (८८)

म जस्तो गतिलो मान्छे चुनावमा हराउला
मेरा कुरा नपत्याए पछाडी दु:ख पाउला । (८९)

यिनै धम्की बिकाएर चुनाव जित्न जान्दछु
जितेकैदिनमा राजा आफैलाई म ठान्दछु । (९०)
क्रमशः

०००
चाँगुनारायण, भक्तपुर