बोकाहरू भुके रे !
कुकुरहरू कृषकको पसिनामा कालो बजारी गर्न पल्किएका तरकारी माफिया जस्ता भए रे ! कुकुरहरू काण्डमा फसाइए रे ! कुकुरले भुक्न छोडेपछि ।
नारायण भट्टराई :
मालिक मालिक्नीलाई चाटेकै भरमा
मिठो खान पाइने भएपछि
न्यानोमा सुत्न पाइने भएपछि
जुठो र बासी खानै नपर्ने भएपछि
सुरक्षा दिने काममा भन्दा
मालिक्नीको चाकडीमा
बढी समय बिताउनु परेपछि
आची भुइँमा झर्न नपाउँदै
मालिकले नै थाप्ने गरेपछि
कुकुरहरूले कुकुरको धर्म बिर्सिए रे !
मान्छेले बिछ्याएको मोह जालमा फसेर
कुकुरहरू कुकुर रहेनन् रे
कुकुरहरू नेताका खेताला जस्ता भए रे !
कुकुरहरू कमिसन लिएर काम नगर्ने ठेकेदार जस्ता भए रे !
कुकुरहरू घुस खान पल्किएका कर्मचारी जस्ता भए रे !
कुकुरहरू कृषकको पसिनामा
कालो बजारी गर्न पल्किएका
तरकारी माफिया जस्ता भए रे !
कुकुरहरू काण्डमा फसाइए रे !
कुकुरले भुक्न छोडेपछि
कुकुरले टोक्न छोडेपछि
पुच्छर लुकाएर लुसुक्क
मालिक मालिक्नीका टाङमुनि छिरेपछि
आफ्नो पहिचानबाट गिरेपछि
गाउँ घरमा विसङ्गति मौलायो रे !
एक दिन स्यालहरू गाउँमा शिकार गर्न आए रे !
कुकुरहरू लुके रे
बोकाहरू भुके रे !
०००
हाल अमेरिका