नेपाली हास्यव्यङ्ग्य अनलाइन पत्रिका

विष्णुहरि पौडेल :

सपना मनले लटरम्म लियो ।
न विकास दियो न निकास दियो ।
निलिँदैन उँधो, नउकेल्नु छ यो ।
गणतन्त्र यहाँ गलगाँड भयो ।१ ।

लुटिए पिटिए निमुखा जनता ।
विधवा,टुहुरा कति छन् विचरा ।
अलपत्र परे, पहिचान गयो ।
गणतन्त्र यहाँ गलगाँड भयो ।२ ।

सुन काण्ड घटे यति काण्ड घटे ।
ललिता दलका मुखभित्र अटे ।
किन नाटक यो,न सजाय भयो ।
गणतन्त्र यहाँ गलगाँड भयो ।३ । ।

तलमाथि सबै तलबी पद छन् ।
दलका भरिया सब सांसद छन् ।
कति बृहत्तर संरचना छ नि यो ।
गणतन्त्र यहाँ गलगाँड भयो ।४ ।

भुस झैं मुखमा घुसको छ बुजो ।
प्रतिवाद गरे भइहाल्छ छुचो ।
गठबन्धन नै फलिफाप छ यो ।
गणतन्त्र यहाँ गलगाँड भयो ।५ ।

न त उद्यम छन् नखुले इलम ।
सुख शान्ति मिलेन गयो अमन ।
बलियो जनशक्ति विदेश गयो ।
गणतन्त्र यहाँ गलगाँड भयो ।६ ।

न छ वाम सही न छ दक्षीण नै ।
जुनले पनि काढ्छ सँधै ऋण नै ।
महगी चुलियो उपवास छ यो ।
गणतन्त्र यहाँ गलगाँड भयो ।७ ।

धनवान् जिउला जसरी तसरी ।
गुनियो पनि फेर्नु र खै कसरी?
निमुखो जनता बरबाद भयो ।
गणतन्त्र यहाँ गलगाँड भयो ।८ ।

०००
काठमाडौं