नेपाली हास्यव्यङ्ग्य अनलाइन पत्रिका

हिरा भट्ट :

आमाको स्वर-“बाबु लेख कविता माटो मसीमा भरी”
दाजैको स्वर-“भाइ लेख कविता झर्ना झरेको सरि”
प्यारीको स्वरमा-“नलेख्नु कविता ताराहरू देखियो”
ए प्यारे अझसम्म लोचन खुला? झन्डा उषाले लियो
।१।

काकाको स्वर-“राजनीति धमिलो हान्नू मट्याङ्ग्राहरू”
काकीको स्वर-“काव्यमा प्रकृतिका छान्नू फट्याङ्ग्राहरू”
छोरीको स्वरमा-“नलेख्नु कविता गर्नू न बाबा नुनु
बाबाले कवितातिरै भुलिदिए लोरी कहाँ पो सुनूँ”
।२।

साथीको स्वर-“बल्नुपर्छ कविता राँको बनोस् लेखनी”
आज्ञा भो गुरुको-“हतार नगरी पाको बनोस् लेखनी”
जिद्दीमा बहिनी-“नलेख कविता बाजे बज्यैझैँ हुनू
खै दादा किन हो बुझिन्न कविता नौलो कहानी सुनूँ”
।३।

बाजेको स्वर भित्र-“देवमहिमा लेखेर बाल्नू दियो”
कान्छाको स्वर भित्र-“वीररस वा शृङ्गार नै चाहियो”
भान्जाको स्वरमा-“नलेख्नु कविता भेट्ने गरी आउनू
भो मामा म त खान्न खान्न कविता पापा किनी ल्याउनू”
।४।

कैयौं रङ्गविरङ्गका कुसुम छन् कैयौं थरी बासना
छन् उद्यान अनेक काव्यवनमा यो साधनामा घना
रित्तो राख्न सुहाउँदैन दिलको झोली म केले भरूँ
छन् दोधार सरस्वती मनमनै खै के गरूँ के गरूँ
।५।

०००
जन्मस्थल:पञ्चेश्वर-६, बिजुल, बैतडी