नेपाली हास्यव्यङ्ग्य अनलाइन पत्रिका

हिरा भट्ट :

ढिस्कानो गुटको फलानु कविका क्या काव्यका हार छन्
बस्छन् पञ्चवटी प्रतीक जहिल्यै लङ्का अलङ्कार झन्
घाटेवैद्य समीप विम्ब रहँदा कारुण्य चीत्कार छ
आँखा खोल ठुला वरिष्ठ कविजी सानो नमस्कार छ
।१।

बोक्यो शब्द त शब्दकोशभरिका गाडी फस्यो जाममा
छाताहीन निपात ठिङ्ग उभिए वैशाखका घाममा
आना-आँगनका ठुला महलमा तिम्रो ठुलै कार छ
आँखा खोल ठुला वरिष्ठ कविजी सानो नमस्कार छ
।२।

जो सर्मालु छ सर्वनाम उसकै टुप्पी उखेल्यो लुछ्यो
झन् निर्दोष गुणी विशेषण बरा टोक्यो चिथोर्‍यो खुच्यो
मेचीमा छ मसी बिचार बिचरो सैपालका पार छ
आँखा खोल ठुला वरिष्ठ कविजी सानो नमस्कार छ
।३।

हिँड्दैछन् पदवर्ग काव्यपथमा काँप्दै र खोच्याउँदै
थारै छन् अझ लक्षणा र अभिधा छिन् व्यञ्जना ब्याउँदै
ऐनाको सतिसालको तरु ठुलो जाँच्दा झिनो झार छ
आँखा खोल ठुला वरिष्ठ कविजी सानो नमस्कार छ
।४।

गोडा अक्षरका विनाकसुरका काटे भुटे खाइए
भङ्गीभाव-चरी मरेछ बिचरी कङ्काल पो पाइए
आठै चारदुना बस्यो गणितमा तिम्रो भने बाह्र छ
आँखा खोल ठुला वरिष्ठ कविजी सानो नमस्कार छ
।५।

ऊ प्राध्यापक शोधपत्र उसमै ऊ नै रह्यो जाँचकी
विद्यावारिधि भग्न नग्न उरकी छाडा विनालाजकी
हात्ती-पुस्तक-खेतका-चरनमा चर्ने मुसो-सार छ
आँखा खोल ठुला वरिष्ठ कविजी सानो नमस्कार छ
।६।

देख्ने भन्छ शवै मिले सब दुला मार्छन् बिराला मुसा
लेख्ने भन्छ सबै मिले शव-दुला मार्छन् बिराला मुसा
माला लाउन लाममा दिनदिनै क्या सौम्य संस्कार छ
आँखा खोल ठुला वरिष्ठ कविजी सानो नमस्कार छ
।७।

बोल्ने बोल्दछ घट्टमा गहुँ भनी माटो पिसानी भए
माफी माग्दछु शब्दले कलमले रेट्दा रिसानी भए
अग्लो एक दुई र तीन सम छन् सानो सधैँ चार छ
आँखा खोल ठुला वरिष्ठ कविजी सानो नमस्कार छ ।
।८।

०००