नेपाली हास्यव्यङ्ग्य अनलाइन पत्रिका

रामप्रसाद पन्थी :

गुरूहरू सडकमा बालक छाैं घर
नयाँ वर्ष नयाँ कक्षा भयाे पर पर ।

नतिजाको टुङ्गो छैन कैले हुने हाेला
कैले जाने पाठशाला बाेकी नयाँ झाेला ?

भर्ना भई पाठशाला जाने बेला सम्म
भाेटे ताल्चा लाएको छ जतासुकै टम्म ।

समयमा पढ्ने लेख्ने हाम्राे अधिकार
कैले सम्म दिलाउछाै भन सरकार ?

उता भने बाेर्डिङले सुरू गरे कक्षा
सरकारी स्कुल कैले गर्छ प्रतिरक्षा ?

जाँचिएला कैले सम्म एस् इ इ का कापी
कैले हाेला जाँच बाह्र भन मेरा साथी ?

सरकारी गुरूहरू सरकारै सँग
दुःखी हुँदा हामी पनि भएका छाैं दङ्ग ।

गुरु चित्त दुखाउने सरकार कस्तो
नबनाए हुन्थ्यो हाेला गुरु शब्द सस्तो !

कति दिन गुरूलाई सडकमा राखी
राम हेरी कति बस्छाै नेता कुर्सी माथि ?

के नै ठूला मागहरू राखेका छन् गुरु
कुरा के हाे बुझ्नलाई गर वार्ता सुरू ?

एक थान शिक्षा ऐन देऊ भन्दा खेरि
सरकार वर्षाैंदेखि के छ हेर्या हेरी ?

दिनै पर्ने शिक्षा ऐन दिए हुन्थ्याे छिटो
ढिलासुस्ती गर्दा शिक्षा भयाे धुलाेपिठाे ।

हठ छाेड सरकार छाेड गुरु जिद्दी
एकै ठाउँ बसी कुरा हुने गर सिद्धि ।

शिक्षा अस्तव्यस्त हुँदा देशै भयाे ध्वस्त
शिक्षा माथि उठाउने गर बन्दाेबस्त ।

युवा शक्ति विदेशिदा कस्काे भलाे हुन्छ
भविष्य नै छैन यहाँ भन्दा मन रून्छ ।

गरी खाने शिक्षा देऊ गुरु मान गर
उपयुक्त शिक्षा नीति सर्कारकै भर ।

०००
रेसुङ्गा न पा २, गुल्मी
२०८२।०१।०७