नेपाली हास्यव्यङ्ग्य अनलाइन पत्रिका

हिरा भट्ट :

आमाको घरमा खुसीसित रम्यौँ सन्तान पत्नी र म
आमाकै मुख हेर्न कत्ति नभुली ऊ जान्छ वृद्धाश्रम
राम्रा प्लास्टिक फूलका कपटले फुल्दो चमेली सड्यो
डिग्री मास्टरको छ भन्छ जहिल्यै खै के पढ्यो के पढ्यो
।१।

अड्डाका मसिना निवेदनहरू लेख्दैन सक्दैन ऊ
डिग्रीका वनको म बाघ हुँ भनी गर्जन्छ डग्दैन ऊ
घोडा पश्चिमको म हाँक्दछु भनी दौड्यो धुरीमा चढ्यो
डिग्री मास्टरको छ भन्छ जहिल्यै खै के पढ्यो के पढ्यो
।२।

चुम्दा खप्तडझैँ सनातन चुली जाबो जिरो ठान्दछ
फेरेँ धर्म भनेर आधुनिक ऊ हक्की हिरो मान्दछ
लत्रेला तुलसी धरातल भुली जो बाँस बुङ्गो बढ्यो
डिग्री मास्टरको छ भन्छ जहिल्यै खै के पढ्यो के पढ्यो
।३।

पाखे ठान्छ असभ्य मान्छ उसले जोडा नमस्कारमा
एबीसी वनको विरासत लिई ऊ बस्छ संस्कारमा
बोरा सार्टिफिकेट बोक्न नसकी गर्ल्याम्म घोडा लड्यो
डिग्री मास्टरको छ भन्छ जहिल्यै खै के पढ्यो के पढ्यो
।४।

कालेले कनिका निका कि ननिका गन्दै निफन्दै गरून्
ऊ ऊभित्र उनीहरू तँ र तिमी जो जो परून् जो परून्
श्रद्धासाथ सरस्वती शरणमा ॐफूल मेरो गढ्यो
डिग्री मास्टरको छ भन्छ जहिल्यै खै के पढ्यो के पढ्यो ।
।५।

०००
कैलाली