नेपाली हास्यव्यङ्ग्य अनलाइन पत्रिका

प्रा. कपिल अज्ञात :

राशि नै देशको नीच नीचैले स्थान पाउँछन्
सुन्छन् भाषण नीचैको नीचैले मान पाउँछन् ।
चलखेल छ नीचैको नीचै नीति भएपछि
नीचै छन् खालमा रम्ने नीचैको गुन गाउँछन् ॥

जिन्दगी नै भयो नीच उच्चता कसरी दरूँ
नीचता बीच बाँचेका नीचता कसरी हरूँ ।
क्षुद्रता नीचता मेरा हीन यो परिवेशमा
नीच निर्मित डु‌ङ्गामा नदी यो कसरी तरूँ ॥

नीचै छन् सपना आशा नीचै छन् जपनाहरू
नीचै छन् जनविश्वास नीचै छन् योजनाहरू ।
भोगभाग छ नीचैको नीच सोच विचारमा
उच्च आधारमा को छ नीचैको यो बजारमा ॥

भागबण्डा उही नीचै नीचैका सहकाजमा
मिलोमतो गरी चल्ने मनोवृत्ति छ राजमा ।
नीति न्याय भयो नीच व्यक्तिको गुणगानमा
नीचैका पथमा चल्दा हुन्छ के गणराजमा ॥

रामायणै छ यो साक्षी नीचैका मतिमा गई
कलीयुग छ यो नीच नीचता नै हुने सही
बीच भङ्ग हुने कार्य सकिन्छ गर्न के हरि !
नरवृत्ति भए नीच पशुकै जिन्दगी सरी ।।

०००
कीर्तिपुर
भुमरीकाे बतास (२०८१)