मेरा गोरुको बाह्रै टक्का
हँ ?
गोरूहरू त जुधिरहेछन् नि हुक्काँ हुक्काँ
गोठालाहरूलाई के नाप्न लागोस् र धक्का
बसिरहेछन् उपरखुट्टी लाएर
घुम्ने कुर्सीमा थपक्क
औंला ठड्याएर मनपरी
बोलिरहेछन् प्वाक्क
र भनिरहेछन् मेरो गोरूको बाह्रै टक्का ।
ओहो यतिका बेर जुध्दा पनि
कसैको सिङ भाँचिएन ?
अहँ
सत्ताका गोठालाहरूलाई
दाउ परिरहेछ छक्का
सत्ताबाहिरका गोठालाहरूका त
जवानहरू छन् लक्का लक्का
लाग्दैन कसैलाई पनि धक्का
र त गरिरहेछन्
मेरो गोरुको बाह्रैटक्का ।
यो गोरु युद्धले कैयौं पटक
जाम गरायो चक्का
कैयौं दिन देश बनायो ठप्प
साँढेहरुको जुधाइमा
थुप्रै बाच्छाहरू किचिए कच्याक्क
हेर्दा पनि लागेर आउँछ दिक्क
एता गोठालाहरू
कुराले मात्र पार्छन् ठिक्क
र भन्छन् संविधान त बन्छ बन्छ पक्का
तर छोड्नै चाहन्नन्–
मेरो गोरुको बाह्रै टक्का ।
बकबक गरेर कति बसिरहन्छौ
ए माले गोरुका गोठाला हो
ए तारे गोरुका गाठाला हो
तिम्रा गोरु मात्र गोरु हुन् र
बडो फुईं गर्दा रहेछौ
लौ आओ चौर खुला छ गोरु जुधाउन
हाम्रा गोरुहरू पनि छन् लक्का लक्का
दिन पनि सक्छन् ठुलै धक्का
हाम्रा गोरुको पनि हुन सक्छ
बाहै्र टक्का ।
बम्घा, गुल्मी