नेपाली हास्यव्यङ्ग्य अनलाइन पत्रिका

लभ माने प्रेम । आधुनिक मान्छेमा प्रेम भन्ने चिज हरायो भनेर धेरै मान्छेहरू भन्ने गर्छन् । मलाई सोध्नुहुन्छ भने प्रेम मरेको छैन । बरू यो झन् मौलाउँदै र परिमार्जित हुँदै गएको छ । आफ्नो पेसा स्वभाव र सिद्धान्त अनुसार प्रेम गर्ने तरिका फरक हुन्छ । आउनोस् विभिन्न पेसामा काम गर्नेहरूका भिन्न भिन्न प्रेमपत्रहरू हेरौँ र प्रेमपत्रको रसपान गरौँ

ड्राइभरको प्रेमपत्र

मेरी जीवनकी स्टेयरिङ
चौथो गियरभन्दा धेरै माया ।

म अहिलेसम्म कन्डिसनमा नै छु । आशा छ तिमी पनि अहिलेसम्म पञ्चर भएकी छैनौ होला ।प्रिय जिन्दगीको टायर खिइँदै गएको छ । त्यसैले कहिलेकाहीँ फोनबाट भए पनि एक आपसमा सम्बन्ध रिसोलिङ गर्दै गर्नु पर्छ ।

केटाकेटीहरूलाई गाली गर्दा आफ्नो हर्न अलि सानो पार्नू, नत्र छिमेकीहरूले घर तोडफोड गरिदेलान् । म पछिल्लोपटक घरबाट हिँड्दा तिमी अलि बिरामी थियौ, आफ्नो शरिरको सर्भिसिङ गर्दै गर्नू । पेटमा हाल्ने डिजेल पेट्रोल किन्न खर्च छोडि दिएकै थिएँ क्यारे । अभाव हुनासाथ खबर गर्नू । आउँदो चक्काजाममा आएर बेट्री चार्ज गरौँला ।

उही तिमीलाई सधैं ब्रेक दिने

हस्तबहादुर लामा
कनकाइ यातायात

प्रहरीको प्रेमपत्र

मेरी प्यारी, जीवनकी सिठ्ठी !
लाइसेन्सभन्दा आकर्षक माया !

तिमीसँग दङ्गा भएर छुटेपछि मनमा अहिलेसम्म अमनचैन छैन । तुरून्त आएर मनको दङ्गा नियन्त्रण गरिदेऊ ।प्रिय तिमीलाई मेरो दस औँलाको स्यालुट छ, मनको सङ्कटकाल नियन्त्रण गरिदेऊ । मेरो आदेशको उल्लङ्घन नगरिदेऊ । यदि त्यस्तो गरेमा तिम्रो माइतमा नै आएर बल प्रयोग गर्न पनि सक्ने छु । याद गर बल प्रयोगमा लाठीचार्ज र टियरग्यासको प्रयोग मैले गर्नु नपरोस् ।

उही तिम्रो
ह. ठण्डाराम थापा