नेपाली हास्यव्यङ्ग्य अनलाइन पत्रिका

रामराज्यमा के हुन्छ तिमीलाई थाहा छ बाबु ? त्यहाँ कसैले कसैको डरभर मान्नु पर्दैन । कसैको चोरी चकारी गरेको ठानिन्न । घरमा ताला मार्नु र नमार्नुमा केही फरक पर्दैन । मन लागे जसले जहाँ जे गर्न पनि पाउँछ । कसैले कसैको डरभर मान्नु पर्दैन । अकालमा कसैले मर्नु पर्दैन । कसैका घरखेत कसैले हडप गर्दैन । बरु आएर बस्छ । कमाएर खान्छ । उसलाई धर्ती हाँस्ने लालपुर्जा चाहिन्न । धर्ती साझा ठान्छ । कसैका प्रमाणपत्र, लालपुर्जाले कसैलाई छेक्दैन । बिनाकसुर आस्थाका भरमा कसैको शत्रु बनियो भने लुक्न भाग्न जता पनि स्वतन्त्र हुन्छ । कसैले घरबास छोराछोरी त्यागेर खेदिनु प¥यो भने जोगी सन्यासी भएको ठाने हुन्छ । यदि कसैबाट पहिले नै लुटिएका भुटिएका चुटिएका निकालिएका भए राम राज्यमा सयवर्ष पछि पनि फिर्ता आइहाल्छन् । रामगाथाको पहिलो अध्यायमा नै फिर्ताबारे रामवाणी भैसकेको छ । बाबु, रामराज्यको पुराण अझ सुन्दै जाऊ ।
कलिकालमा अनिकालले कोही भोका छन् भने रामराज्यमा एउटाले गरेको खेती अर्कोले बिनारोकतोक क्वाप्पै खान सक्छ, खान्छ, खाइरहेको छ । एउटाको सम्पति अर्कोले बेच्छ । तै पनि कसैले बोल्न पाउँदैन, बोल्दैन, आखिरमा छाडी जाने धर्ती न हो । जग्गाधनी लालपुर्जा समाउँछ, अर्कोले कमाउँछ, उसै खान पाएर तेस्रोचाहिँ रमाउँछ ।
सुन्यौ बाबु, रामराज्य ? जसको लाठी उसको भैँसी, जसको गन उसको वन, एउटाले कमाउने अर्कोले समाउने त रामराज्यका रूपलक्ष्यण हुन् । रामराज्य कस्तो बुन्छ बा ! भन्या होइन ? आफैँले देखे भोगेपछि मैले बताइरहनु प¥यो त ? केहीमात्र बताएको हुँ । यही हो रामराज्य । अकाल मरण, हिंसा, हत्या हरण, अपहरण यी सबै रामराज्यका नमुनाबाट बाह्रवर्ष बितिसके अब पनि देखेनौ र सोधेको रामराज्य ? अझै हेर प्रत्यक्ष रामराज्य । साँच्चैको रामराज्य त अझै चल्दै छ । हरे रामले, हराम हराम, हरे राम, हर्कत भएका राम अझै हर राम, भनेर राम भजन गाई बसे हुने भएको छ । यस्तै हो रामराज्य भनेको । रामराज्यमा कसैले चिन्ता गर्नु पर्दैन । उदार आँखाले हेर्नु पर्दछ । यस्तो राज्यमा लुटपाटलाई उत्पात मानिन्न । एउटाको खल्तीको सम्पति अर्काको खल्तीमा पुग्नुलाई माथिल्लो गराको माटो तल्लो गरोमा झरेर बसेसरह माने हुन्छ । लामोहात गर्नेले पनि मरेर जाँदा यहीँ राखेर जाने कुरो बुझेको हुन्छ रामराज्यमा । राज्यका पहरेदार वरण राम, चन्द्रराम, बादलराम जस्ता अनेकन् रामैराम छन् । आखिरमा राम भरोसा त हो । भज बाबु ! राम भज । धेरै रामका समूहमा कुनै हराम भए पनि रामराज्यमा केही फरक पर्दैन । एक थोपा विषले र एक थोपा अमृतले नै हो रामराज्यमा प्रभाव पार्ने ! पार्दै छ पारिरहेछ । कसैले खेतबारी किनेँ भनेर लालपुर्जा देखाउँदा धर्ती हाँस्छिन् रे ‘कति वर्षसम्म कमाएर खालास् ?’ भनेर । यो रामराज्यमा लालपुर्जाको त्यति मतलब भएजस्तो लाग्दैन । कोही कमाइरहेछन्, कोही समाइरहेछन् त कोही रमाइरहेका छन्, अनि त भनिन्छ रामराज्य ।
रामराज्यमा ‘गन’ (बन्दुक) तन्त्र, गणतन्त्र, जन गन (गणना गर) तन्त्रदेखि जनगणतन्त्रसम्मका व्यवहार जसले जसरी देखाए पनि चल्न पाउने अवस्था हो बाबु यो रामराज्यको । रामराज्यमा कसैको साम्राज्य चल्दैन । पाम् राज्य र खामराज्यको लोभलालच कसैले गर्दैन । आखिरमा राम भजन नै त हो कसैले चन्द्र राम, चन्द्र राम भजेका छन् । कसैले वरण राम वरण राम भजेर रामको वरण गरिरहेछन्, कसैले भने बादल राम, बादल राम भनेका छन् त कसैले त हेर बाबु, रामराम भजिरहेछन् । रामराज्यमा भज्ने नै राम हो । जप्ने नै राम हो । जसरी जसले जसलाई जपे पनि हुन्छ जप । रामराज्यमा अरुलाई होइन रामलाई नै जप । धराधाममा बस्न नपाएर छिटै परमधाम भए पनि स्वर्गधाममा राम्रै ठाम पाउने छौ ।

ट्याङ्ला, कीर्तिपुर