नेपाली हास्यव्यङ्ग्य अनलाइन पत्रिका

(विश्व खुट्टे–भकुण्डो जात्रा २०१४ को सन्दर्भमा)

बिहानै भकुण्डो भकुण्डै छ राती !
भकुण्डो बने झैं जुटे झुण्ड साथी !!
भरी सोम–प्याला भकुण्डे गिलास !
भकुण्डे बहाना बन्यो आज खास !!

अहो रात्र गुञ्ज्यो हरे गोल गोल !
छ सानो भकुण्डो महँगो छ मोल !!
असाध्यै पियारो बनेको छ हुस्की !
छ प्यारो भकुण्डो र प्यारो छ चुस्की !!

लगाएर बाजी हजारौ हजार !
नयाँ रोजगारी बनेको छ आज !!
भकुण्डे छ माली भकुण्डो छ बोट !
भकुण्डे बगैंचा फलेको छ नोट !!

भकुण्डो बनेका सबै बृद्ध–बाल !
सबैको छ साझा भकुण्डे सवाल !!
भकुण्डै छ हावा भकुण्डै छ पानी !
भकुण्डो बनेझैं भयो जिन्दगानी !!

बैतडी