नेपाली हास्यव्यङ्ग्य अनलाइन पत्रिका

ए अङ्कल हजुरको गाला किन त्यत्रो ठूलो ?
काँधमा नै नअटाउने माला किन त्यत्रो ठूलो ?

हजुर त बच्चा जस्तो झगडा पो गर्नु हुन्छ
आफ्नै दाजु–भाइ बीच ज्वाला किन त्यत्रो ठूलो ?

दिनभरी काम गर्ने ज्यामी भोकै मर्छन् यहाँ
हजुरलाई सुत्दा पनि ज्याला किन त्यत्रो ठूलो ?

गर्न सक्ने कुरा मात्रै भाषणमा बोल्दा हुन्न ?
आशै आशले बनेको त्यो भाल किन त्यत्रो ठूलो ?

हजुरले संविधान क्वाप्पै खानु भाको रे त ?
होइन भने पेटमा मात्रै छाला किन त्यत्रो ठूलो ?

कि त ब्याउनु कि ओकल्नु भुँडीको त्यो चिज
नौटङ्की त्यो गाईजात्रे चाला किन त्यत्रो ठूलो ?

नलाङ– ७, धादिङ