नेपाली हास्यव्यङ्ग्य अनलाइन पत्रिका

विश्वका सबैभन्दा जेठा देशहरू मध्ये नेपाल हो भनेर धाक लगाउन हुन्छ
तर २००७ सालभन्दा पहिलेका नेता, राजा, अगुवाहरूबारे राम्रा कुरा भन्न हुन्न है हुन्न !

मल्ल लिच्छवी कालमा बनेका संरचनाको धाक लगाउन हुन्छ
तर ती निर्माणकर्ताको सम्मानमा केही बोल्नु, गर्नु हुन्न है हुन्न !

“मेचीदेखि महाकाली, हामी सबै नेपाली” भनेर उफ्रन हुन्छ
तर त्यो एकीकरण गर्ने “पृथ्वीनारायण शाहकी जय” भन्नु हुन्न है हुन्न !

हामी कहिल्यै अङ्ग्रेजको गुलाम भएनौँ भनेर धाक लगाउन हुन्छ
तर त्यस्ता अङ्ग्रेजबाट देश जोगाइ राख्ने राणाहरू लगायतको प्रशंसा गर्नु हुन्न है हुन्न !

पञ्चायत व्यवस्थाले बसाएका विकास–सुधारका पूर्वाधारहरू उपभोग गर्न हुन्छ
तर त्यतिबेलाका सुधारकर्ता राजा “महेन्द्रकी जय” भन्नु हुन्न है हुन्न !

राजा वीरेन्द्रको बंश नाश भएकोमा दया देखाउन हुन्छ
तर ती राजाले प्रजातन्त्रलाई हुर्कन दिएको संरक्षणको प्रशंसा गर्न हुन्न है हुन्न !

अहिले भएका नेता मात्रै पो नेता हुन् त, यिनैले देश बनाए र बनाउँछन् भन्न हुन्छ
तर त्यो भन्दा पहिले पनि धेरै राजा र नेताले यो देशमा धेरै बनाएका थिए भन्न हुन्न है हुन्न !

विवेक बेच्दै र तथ्य मिच्दै अहिलेका शीर्षस्थ नेताहरूले नै नेपाल आज्र्याको हो भन्न हुन्छ
तर यी ६०१ हाम्रा नया मालिकले जे भन्छन त्यसमा नाई, होइन या हुन्न भन्नु हुन्न है हुन्न !

बत्तिसपुतली, काठमाडौं