नेपाली हास्यव्यङ्ग्य अनलाइन पत्रिका

कस्तो दशाको दिन परेछ
उसको नमस्कार फर्काई हालेँ
उ त बिचार सुनाउन तम्तयार रहेछ
नमस्ते त उसले आफ्ना बिचार सुनाउन पो गरेको रहेछ !

कुरो बुझेर म के गरूँ गरूँमा परेँ
र भनेँ–
ल आउनुहोस् हामी बिचार गरौँ,
नौलो काम हो तर “ट्राई” गरौँ
न पैसा न परिश्रम लाग्छ,
त्यसैले त जो पनि बिचार गर्छ
हामी पनि त “ट्राई” गरौँ,
आउनुहोस् हामी बिचार गरौँ

बिचार नसके बि ३ गरौँ,
बि ३ नसके बि २ दुई गरौँ
बि १ बाटै सुरु गरौँ,
बि सून्यले के फरक पर्छ ?
न परिश्रम न पैसा पर्छ,
जति सकिन्छ त्यति गरौँ
हामी पनि त “ट्राई“ गरौँ
आउनुहोस् हामी बिचार गरौँ ।

त्यसपछि जब उहाँले विचार व्यक्त गर्नु भो
मैले भन्नु पर्ने भो
ओहो ! तपाईंले त शुरु गर्नु भो
पहिलो “ट्राई” नै सफल गर्नु भो
कस्तो राम्रो बिचार गर्नु भो
गजब गजब गजब गर्नु भो
तपाईंले पनि बिचार गर्नु भो
गजब गजब गजबै गर्नु भो ।

कस्तो राम्रो बिचार गरेको !
त्यस्तो राम्रो बिचार पनि
किन सित्तै व्यक्त गरेको ?

बिचार ठुलो मानव धन हो
ठुलो बिचारको मानिस ठुलो हो
बिचार तपाईको अमूल्य धन
त्यो पनि सित्तै व्यक्त गर्ने हो ?

बिचार तपाईले ब्यक्त गर्नु भो
त्यत्रो घाटा व्यर्थ गर्नु भो
बिचारको ट्युसन दिँदा कमाउने
सम्भावना थियो, ध्वस्त गर्नु भो ।

तपाई बिचार गर्न नछोड्नुहोस्
बिचार गर्नुहोस् तर गोप्य राख्नुहोस्
बिचार कोही माग्नै आए
पैसा लिई मात्र व्यक्त गर्नुहोस्
सित्तै व्यक्त गर्दै नगर्नुहोस् ।

भन्नु होला,
ठुला बडा बिचार व्यक्त गर्छन्
व्यक्त गरि गरि पदमा पुग्छन्
म पनि बिचार व्यक्त गर्दछु
व्यक्त गरि गरि पदमा पुग्दछु !

यहाँ तपाईंको बिचार पुगेन
उनका बिचार त सस्ता थिए
त्यसैले पो त सित्तैँ दिए
त्यो पनि पदमा पुगेपछि दिए
के थाहा त्यति बिचार दिँदा
उनले पदमा के के लिए !

तपाईंका महान् विचारलाई
उनकासँग दाँज्नु भएन
हिरा मोतिलाइ गोबरसँग दाँज्नु भएन
तपाईंका महान् विचार यसरी सित्तैँ दिनु भएन ।

तपाईंका बिचार ठुला पद सुहाउने छन्
सित्तै व्यक्त गर्न नसुहाउने छन्
त्यसैले बिचार आफ्ना गोप्य राख्नुहोस्
अहिले मसँग पैसा छैन
पैसा ल्याउला अनि सुनाउनुहोस्
कृपया बिचार गोप्य गर्नुहोस् ।

हाम्रा महान् विचारकले
मेरो बिचारलाई ठिक ठान्नु भयो
त्यसपछि जब कोहि भेट हुन्छ
तपाईंसँग कति पैसा छ ?
पहिल्यै सोध्नु थाल्नु भयो ।

पैसा छैन भने पछि चुप बस्नु भयो
उहाँ महान विचारक हुनु भयो
भेट भइहाले पनि अब डर भएन
पैसा छैन भने पछि कान सन्चो भयो !
मेरो दसा सधैंका लागि गयो
उहाँ महान् विचारक हुनु भयो !!

बत्तिसपुतली, काठमाडौं