नेपाली हास्यव्यङ्ग्य अनलाइन पत्रिका

एउटा बतास आयो, नेपाली जुर्मुरायो
झिक्यो खुकुरी हातमा संसारलाई हरायो
थर्काई सारा दुनियाँ हिम्मत ठुलो देखायो
सबले भने बाहादुर, सम्मान त्यो कमायो ।

तिनकै सन्तान हामी लड्दै र भिड्दै आज
आपसमा काटाकाट कसले दिने हो ताज ?
आपत बनेर आफ्नै स्वजन अनि स्वदेशको
के नाम हो कमाउने कीर्ति हो राख्ने कसको ?

राख खुकुरी दापमा फैलाऊ दुई हात
अँगालो मार अर्को नेपालीलाई साथ
बढौं मिली अगाडि हाँस्दै अनि हँसाउँदै
शान्तिको गीत गाउँदै पौरखले कमाउँदै ।

यो युग शान्तिको हो, हाम्रो स्वभाव शान्त
शान्तिको वीरतामै अस्तित्व छ अनन्त
त्यो युग फेरि आउँछ नेपाली जगमगाउँछ
शान्तिको यो बहादुर कीर्ति नयाँ कमाउँछ ।
बत्तिसपसतली, काठमाडौं