नेपाली हास्यव्यङ्ग्य अनलाइन पत्रिका

कुरा मिलेझैँ अब चार भाइ
चारै दिशाका सँगमा रमाई
बोली नमिल्ने तर एक जस्तै
देखावटी हो कि व्यथा छ उस्तै ? ।

हो, निस्किए टार पसेर आजै
विचार भिन्नै तर लक्ष्य साझै
बन्ने भयो झैँ घर एक सस्तो
खै बालुवाको घर टिक्छ कस्तो ! ।

सिकारु कर्मी अथवा गफाडी
बुझ्दैन कोही घरका पछाडि
नौलो मिलेको घर बन्छ बन्छ
रटान यौटै नव वास बन्छ ।

गाँठो नफुक्ने त कुरै भएन
सद्धर्म आफ्नो पनि फेरिएन
पक्रेर यौटै द्रुतमार्गबाट
अवश्य नौलो घर बन्छ, आँट ।

कोठा मिलेरै पनि बाँड्न सक्ने
प्रकाश हावा जल साट्न सक्ने
होला गुनासो कति वस्तु पाऊँ
इच्छा सबैको कसरी जुटाऊँ ।

सँगै सुते पाउ अवश्य छुन्छ
कोठा बने भाउ प्रशस्त हुन्छ
वार्ता मिलेको छ भएर छाड्छ
कोठाहरू भाग पुगेर छाड्छ ।

शंका अझै त्यो छत बन्छ कस्तो
जस्ता भए तात्तछ अग्नि जस्तो
पराल हालेपछि डढ्न सक्छ
ढलान नै फुट्छ कि सड्न सक्छ ।
काठमाडौं